Мажите во средни години, кои имаат 75 или повеќе отчукувања на срцето во минута, за време на одмор, имаат за два пати поголем ризик од смртност од коронарни срцеви болести, укажува најнова студија во која учествувале 798 мажи на возраст од над 50 години.
Истовремено се покажало и дека мажите чија брзина на отчукувања на срцето се зголемила во текот на 50. години од животот, исто така имале поголема веројатност да развијат некоја срцева болест во 60. години.
Срцевиот пулс во мирување се однесува на брзината на отчукувањата на срцето кога лицето одмора најмалку пет минути. Се смета дека брзината од 50 до 100 отчукувања на срцето во минута е нормална. Пониските бројки укажуваат на подобра кардиоваскуларна кондиција и поефикасно функционирање на срцето.
Фактори кои можат да го зголемат бројот на отчукувања на срцето во мирување се: недостаток на сон, претерано вежбање, стрес и дехидрација.
Пулсот е низа на притисочни бранови во артериите на системот на крвотокот кои настануваат со потискување на крвта при контракција на левата срцева комора. Пулсот може да се мери со палпација на перферијата, аускултација и ултразвучно. Најчесто се мери со палпација на површинските артерии.
Фреквенцијата на пулсот означува број на отчукувања во една минута, додека ритамот на пулсот означува временска разлика помеѓу пулсирањата.
