Мажите кои заработуваат за живот работејќи тешки физички работи имаат поголеми шанси за порана смрт отколку оние кои имаат „седечки“ работни места, покажало новото истражување.
Истражувањето спроведено на холандскиот Универзитет VU покажало дека големата физичка активност може да биде лоша за телото кога сте на работа, а истата ви помага кога ја правите во слободното време.
„Причината за тоа не е сосема јасна, но претпоставуваме дека е затоа што луѓето на работа прават сосема различни „вежби“ од оние кои ги прават во слободното време, изјавил Питер Коње, еден од истражувачите, пишува „Гардијан“.
„Иако знаеме дека физичката активност е добра за нас, откривме дека преголемата активност на работа го зголемува ризикот од предвремена смрт за 18 отсто во споредба со мажите, кои не се толку физички активни на своето работно место“, објаснил Коње
Тој истакнал дека има голема разлика помеѓу трчањето после работа, кое трае половина час и целодневната физичка работа.
„По трчањето се чувствувате добро и одморате, но на работа сте осум часа активни, кревате предмети, повторувате одредени движења, многу ги користите рацете, а време за одмор немате колку што ви треба, па затоа таквата активност лошо влијание врз кардиоваскуларниот систем, за разлика од трчањето или фитнесот, кои му помагаат“, објаснил Коње.
Истражувањето вклучило 200 000 луѓе од 17 различни студии врз основа на кои се добиени овие податоци.
