Во истражувањето биле опфатени 308 лица вработени во болниците при Универзитетот во Стразбур кај кои е потврдено присуство на вирусот, главно со благи симптоми на болеста.
Нивото на различни антитела било мерено со користење на три различни теста два пати, во период од 172 часа.
Првото мерење покажало дека мажите постари од 50 години и оние со индекс на телесна маса поголема од 25, имаат највисоко ниво на антитела.
Со второто мерење, откриено е дека нивото на антитела во поголема мера опаднало кај мажите отколку кај жените, независно од возраста или индексот на телесна маса, се наведуваат во студијата.
“Нашето истражување покажа дека мажите покажуваат посилен одговор во акутната фаза, искажан со повисоко ниво на антитела, но со тек на време нивото опаѓа многу побрзо отколку кај жените, кај кои антителата истануваат на многу постабилно ниво“, вели д-р Самира Фафи-Кремер.
Оливер Шварц, еден од авторите на студијата, вели дека опаѓањето зависи од почетното ниво на антитела. Доколку нивото на антитела е повисоко, опаѓањето ќе биде побрзо, но се уште не се знае поради што точно тоа се случува, додава тој.
Сабра Клајн од Универзитетот Џон Хопкинс, истакнува дека научниците кои работат на развојот на вакција, би требало да го анализираат и споредат одговорот на мажите и жените на вирусот со тек на времето, бидејќи е можно кај мажите да дојде до губење на антителата и по вакцинацијата.
“Мажите можеби би требало да примат втора, помошна вакцина за да го зачуваат имунитетот на вирусот“, тврди Клајн.
Научниците се уште не знаат се за имунитетот на новиот коронавирус. Тие предупредија дека антителата, кои ги создаваат Б-клетките и кои имаат клучна улога во одбрана на организмот, не се единственото оружје на имуниот систем на човекот. Еднакво се важни и Т-клетките, чија задача е да го стимулираат производството на Б-клетки и да ги уништат респираторните клетки во кои живее вирусот.
