Исклучително здрава и, пред се, вкусната тиква, крие многу лековити својства. Од неа се приготвуваат разни солени и благи јадења, колачи, пити, супи и варива. Но дали некогаш сте слушнале за мед од тиква? Можеби е помалку познат, но овој лек го јакне имунитетот во периодот грип и настинки, одлично делува на дигестивниот тракт, црниот дроб, бубрезите и уринарниот систем.
Тиквата е нискокалорична, одличен избор во исхраната на дијабетичарите и сите оние кои имаат проблеми со желудникот и тенкото црево. Совршено го регулира варењето, заради високата содржина на целулоза и пектин, а богата е со низа витамини: А, Ц, Е и од Б групате, како и калиум, калциум, железо, бета каротен.
Медот од тиква, кој многу лесно се приготвува, има благо лаксативно и диуретско дејство, бидејќи ја регулира дигестијата, поволно влијае на црниот дроб и на бубрезите и го поттикнува лачењето на жолчката. Исто така, се смета за природен лек за уринарните патишта. Поради сето ова, овој мед едноставно мора да го пробате и да го ставите на листата на домашни и природни, а многу вкусни лекови.
Како да направите мед од тиква?
Отстранете го горниот дел од тиквата и исчистете ги семките. Во дупката што сте ја издлабиле, ставете мед или кафеав шеќер, па поклопете со врвот. Оставете да стои десет дена на ладно место во некој поголем сад, бидејќи тиквата со тек на време ќе омекне, па тешко ќе ја мрдате. Во тој период, шеќерот, односно медот во тиквата потполно ќе се стопи. Откако ќе се стопи, тргнете го капакот и добиената течност соберете ја во стаклени тегли. Медот најдобро е да се чува во фрижидер, во чиста, стаклена тегла со капак, најмногу еден месец. Доколку сакате да го чувате подолго, тогаш може да го варите додека се згусне, но тогаш се губат корисните состојки.
