![6](https://panacea.mk/wp-content/uploads/2021/07/6-5-696x440.jpg)
При постапка на правење биопсија, медицинското лице зема мал примерок од ткиво или клетка од органот за кој постои соменвање дека е зафатен со карцином, инфекција или е присутен некој друг здравствен проблем. Земениот материјал или примерок се испраќа во лабораторија каде стручни лица бараат клетки кои може да имаат штетно влијание на вашето здравје.
- ПОДГОТОВКА
Вашиот лекар ќе ви каже што треба (или не треба) да направите пред биопсијата. На пример, можеби ќе треба да земате некои лекови кои ви се во трајна терапија, или нема да смеете да јадете или пиете неколку часа пред биопсијата. Ако сте договорени со лекарот, биопсијата да се прави со целосна анестезија, замолете некој да дојде со вас да ви помогне да си отидете дома.
- ШТО ПО НАПРАВЕНАТА ПОСТАПКА
На местото на земање на примерокот од ткиво може во наредните неколку дена да чувствувате болка и нелагодност, но лекарот ќе ви препише лек против болки доколку е потребно. Држете се до упатствата од лекарот, за тоа колку долго треба да носите завој и да водите грижа за местото на убодот.
- РЕЗУЛТАТИ
Кај некои видови на биоспија, лекарот може веднаш да го тестира примерокот за брзи резултати. Останатите резултати, најчесто се готови за еден или два дена, но понекогаш треба да се причека и неколку дена.
- БИОПСИЈА СО ИГЛА
Кај овој вид на биопсија, лекарот користи игла за да земе примерок од сомнителното ткиво. Оваа метода најчесто се препорачува за тестирање на ткиво од дојка, лимфни јазли, штитна жлезда или тестиси.
Постапката се врши амбулантски и обично трае помалку од еден час. Прво се чисти и умртвува местото на убодот, а во текот на постапката, лекарот се служи со ултразвук или некој друг начин за добивање увид во внатрешноста на телото – тоа му помага полесно да управува со иглата и да земе сакан примерок од ткивото. По постапката, местото на убодот се заштитува со завој.
- БИОПСИЈА НА КОЖА
Со оваа постапка се тестираат бенки, израстоци, осип или лезии на кожата. Често се користи кога е присутен сомнеж за рак на кожа.
Ако сомнителното подрачје го зафаќа само површинскиот дел на кожата, лекарот ќе избричи мал примерок со посебен брич или скалпел. За подлабоки израстоци може да биде потребна процедура која се нарекува биопсија на бушење. За оваа постапка лекарот користи мал инструмент сличен на цевка со оштри краеви. По земање на примерокот, местото се затвора со еден шав.
По биоспијата, на тоа место можеби ќе забележите црвенило на кожата, но не треба да боли. Може местото да се намачка со крема за да се спречи сушење на кожата и појава на инфекција. Лузната треба да заздрави за три недели.
- ЕКЦИЗИЈА И ИНЦИЗИЈА НА КОЖА
Овие постапки главно се користат за тестирање на кожата, градите, лимфните јази или мускулите.
Екцизијата е постапка при која се иззема цел полип или поголемо подрачје од кожата. Со инцизијата се зафаќа мал дел од површината, но лекарот оди и во подлабоките слоеви на кожата. Зависно од тоа на кое место е и колку подрачје треба да зафати, лекарот го умртвува тој дел или може да даде целосна анестезија. Можно е да се појави болка, а може и да забележите лесно крварење. Но, ако болката е силна и раната обилно крвари, веднаш отидете на лекар.