Дауновиот синдром претставува состојба, а не болест! Денеска, кога светот го одбележува 21 март, Меѓународниот ден на лицата со Даунов синдром, облечете шарени чорапи и покажете ја вашата поддршка. Покажете им на овие лица дека се грижите за нив и ги прифаќате онакви какви што се, од глава до петици, без бариери и предрасуди. Тоа е и единствената нивна желба (и право): да бидат прифатени како и сите други. 
Меѓународниот ден на лицата со Даунов синдром е востановен во 2006 година, а датумот – 21-от ден од 3-от месец во годината, беше симболично избран за да ја означи уникатноста на трипликацијата (трисомија) на 21-от хромозом кој предизвикува Даунов синдром.
„Етикетите се за облека, не за луѓе“: Девојче со Даунов синдром – успешна на модните писти
Шестгодишната Кора Бишоп која има на Даунов синдром е една од шесте модели, кои неодамна беа избрани за промоција на новата модна линија на британската компанија „River Island.“
Нејзината мајка, Шерил (32), изјавила дека не може да објасни колку е горда на Кора и дека нејзиниот успех и дава верба дека девојчето може да постигне се што ќе посака во нејзиниот живот.
Ова прекрасно девојче со долга златно-руса коса, било забележана од страна на агенцијата „Зебеди менаџмент“, која е специјализирана за работа со лица со попреченост. На Кори и биле потребни само 10 минути за да ги воодушеви сите и да биде веднаш избрана за едно од лицата на компанијата која прославува три децении постоење.
„На Кори и се допадна снимањето. Беше во свој елемент. Таа просто обожава да биде во центарот на вниманието. Обожава се што е за девојчиња. Ја однесоа на снимање на реклама, и дадоа балони и не мораа ништо да и кажат ниту да и посочат што да работи. Кори почна да трча и да си игра со балоните“, рекла нејзината мајка Шерил.
Таа додала дека се надева оти нејзината ќерка ќе може да ги прави сите работи кои ќе ги посака. Рекла дека кога прв пат ја видела, таа и нејзиниот сопруг, веднаш се вљубиле во неа.
Хуманитарна трка на 25 март во Градскиот парк: Трчаме за децата со Даунов синдром
Под мотото „И ние го можеме истото како и сите!“ на 25 март, со почеток во 11 часот и старт пред Школка во Градски парк, по трет пат ќе се одржи хуманитарната трка на 1 км за децата со Даунов синдром.
Организатор на трката е ЗМК „Ескрим“. „Со овој настан сакаме да ја подигнеме свеста за овие прекрасни личности, да ги поттикнеме и останатите спортски клубови да ги отворат вратите за децата со Даунов синдром, да ги вклучиме во спортот и да им обезбедиме еднаков пристап до него како и за редовните деца. За овие деца спортувањето е од огромно значење бидејќи развиваат моторика, координација, одржување на баланс, тонус на мускули. Сите овие работи се многу важни за нивен понатамошен самостоен живот. Со спортувањето добиваат уникатна социјализација, стекнуваат нови пријателства. Инклузијата како сегмент кој што го развиваме дава исклучителни резултати во нивниот живот“, велат од „Ескрим“.
Трката е отворена за сите хумани граѓани, а во неа ќе учествуваат и децата со Даунов синдром и нивните семејства.
Собраните средства од пријавите ќе се искористат за набавка на аудио опрема за Дневниот центар за лица со Даунов синдром.
