Денес, 12. мај е Меѓународен ден на сестринството и се одбележува под мотото “ Медицински сестри: Глас што поведува – визија на здравство на иднината“.
“Оваа глобална пандемија со КОВИД-19 му ја покажа на светот важната улога што медицинските сестри ја играат во одржување на здравјето на луѓето во текот на целиот животен век“, изјави Анет Кенеди, претседателка на Меѓународниот совет на медицински сестри – ICN.
На овој важен ден сакаме да им оддадеме почит пред се на оние кои ги загубија своите животи во борбата со коронавирусот, но и да им искажаме поддршка на сите останати здравствени работници кои успешно, секојдневно се справуваат со КОВИД-19.
Медицинските сестри како важна алка во здравствениот систем, активно се вклучени во борбата со пандемијата, од собирање на податоци за клинички и епидемиолошки студии, епидемиолошки анкети, преку активна грижа за пациентите и заедницата се до процесот на вакцинација против КОВИД-19.
Токму овие бројни медицински работници играат клучна улога во здравствената заштита и честопати се незнајни херои во здравствените установи. Медицинските сестри често се првите кои ги откриваат итните здравствени случаи и работат во првите редови на превенција на болести и испорака на примарна здравствена заштита, вклучително и промоција, превенција, третман и рехабилитација. Тие често се првиот, а понекогаш и единствениот здравствен работник што ќе го види пациентот и квалитетот на нивната првична проценка и последователната грижа е од витално значење за добри здравствени резултати.
Медицинската сестра е оној топол збор со кој прво се среќаваме, утеха во тешките денови на болест, поддршка…
Затоа, ви го честитаме овој 12. мај! Бидете живи и здрави!
