Менопаузата најчесто се јавува на возраст од 45 до 55 години. Симптомите се поврзани со пониски нивоа на естроген и други хормони, а еден од најчестите симптоми се топлите бранови или валунзи, односно ненадејното чувство на топлина кое понекогаш е придружено со потење.
Симптомите на менопаузата влијаат на квалитетот на животот, го нарушуваат сонот и резултираат со полошо физичко здравје.
Валунзите или брановите на топлина поврзани со менопаузата, како и потењето во текот на ноќта, не се краткорочни проблеми. Повеќе од половина од жените ги доживуваат овие непријатни симптоми за време на менопаузата, а не знаат дека истите можат да потраат и до седум години, па и повеќе.
Четири од пет жени искусуваат валунзи и ноќно потење дури и неколку години пред да им престане менструацијата, па стигнуваат до речиси 12 години непријатни симптоми со кои се соочуваат секојдневно
Една од опциите за решавање на овој проблем е заменската хормонска терапија, која многу жени ја избегнуваат, бидејќи е поврзана со зголемување на ризикот од рак на дојка и рак на јајниците за дури 40 %.
Жените кои имаат надминато некој облик на рак, особено рак на дојка, не треба да земаат заменска хормонска терапија, туку мора да најдат друго решение.
Експертите тврдат дека првиот чекор содржи неколку едноставни работи што можат да помогнат, вклучувајќи облекување во слоеви, избегнување на кофеин, алкохол, пушење и зачинета храна, пиење ладна вода и разладување на просториите.
Дополнително, ниските дози на антидепресиви како што се ефексор (венлафаксин) или паксил (пароксетин) може да ве ослободат од брановите на топлина.
Сепак, некои жени не сакаат да земаат лекови, бидејчи често имаат несакани ефекти. Во овој случај се препорачува акупунктура, јога, вежби за дишење и медитација. Во принцип, секоја жена треба да проба и да си го најде својот начин на олеснување на тегобите, бидејќи не постои гаранција дека овие методи ќе делуваат кај сите жени, пишува „Everydayhealth“.
