Месечарењето се вбројува во пореметување на спиењето, т.н. парасомнија. Станува збор за необични однесувања кои се јавуваат во текот на спиењето, а вклучуваат месечарење, ноќни кошмари и пореметувања на РЕМ фазата на сонот.
Парасомнијата често може да се влоши во период на стрес, а кај некои може да биде поврзана со анксизност и депресија.
Основно одбележје на месечарењето е појава на автоматско однесување во текот на ноќта. Лицето кое месечари не реагира на надворешните дразби или на лицата кои се наоѓаат во близина.
Месечарењето најчесто вклучува одење низ дома, но може да вклучува и други познати активности како перење, облекување, варење кафе или чај… Месечарењето може да биде поттикнато од потребата за уринирање, па така лицето станува од кревет, извршува нужда и се враќа на спиење, а утрото воопшто не се сеќава дека станало во текот на ноќта.
Со оглед дека активностите за време на месечарењето може да бидат опасни, заблуда е дека овие лица не треба да се разбудат во тие моменти. Секако, потребно е внимание во моментот на будење, за да се избегнат повреди.
Инциденцата на месечарење не е во целост позната, но се смета дека преваленцата е 15-20 % во текот на животот. Лицата ретко се јавуваат на лекување, освен ако за време на месечарењето не се повредат. Почесто е кај децата, особено меѓу третата и седмата година од животот. Најчесто децата го надраснуваат проблемот со текот на годините, како се намалува количината на длабок сон.
