Постојат низа студии кои го поврзуваат месецот на раѓање со инциденцата на заболувања, а неодамна кон нив се придружи и онаа направена од страна на шпанскиот универзитет Аликанте, чии истражувачи ја анализираа врската помеѓу месецот на раѓање на 30 000 испитаници и 27 хронични заболувања за да утврдат дали периодот на раѓање (и зачнување) влијае на долгорочното здравје.
Студијата покажала дека бебињата родени во септември имаат најмалку шанси да развијат хронична болест. Но мажите родени во септември имаат дури три пати повеќе шанси да страдаат од проблеми со тироидната жлезда отколку оние кои се родени во јануари.
Остеопорозата е повеќе распространета кај дамите родени во април, мај, септември и октомври, додека мажите кои се родени во март, јуни и декември најверојатно ќе заболат од катаракта подоцна во животот.
Жените родени во јули имаат 25 отсто поголема веројатност да добијат висок крвен притисок, додека „јунските“ мажи имаат 34 отсто поголеми шанси да заболат од депресија
Научниците велат дека постојат разлики помеѓу децата родени во зимските и летните месеци, бидејќи се разликуваат и надворешните фактори одговорни за развој на имунитетот. Особено е важна сончевата светлина која влијае на производството на витамин Д, кој може да игра витална улога во заболувањата подоцна во животот.
