Неодамнешното истражување покажало дека мешунките како замена за компири или ориз може да го намалат нивото на гликоза во крвта за повеќе од 20 проценти. Научниците откриле дека оваа замена може значително да го подобри одговорот на организмот при внесувањето на јаглехидрати.
Во истражувањето учествувале дваесет и четири возрасни испитаници, кои научниците ги поделиле во четири групи и ги хранеле со различни видови на храна – едната група добила само ориз, на другата и била дадена половина порција бел ориз и половина порција крупна зелена леќа, третата имала половина порција бел ориз и половина ситна зелена леќа, а четвртата добила половина порција бел ориз и половина црвена леќа.
На испитаниците им било измерено нивото на гликоза во крвта пред да ја консумираат споменатата храна и два часа подоцна. Постапката била повторена и за порција компири и комбинација од компири и леќа.
Резултатите покажале дека нивото на гликоза во крвта се намалило за 20 % кога оризот бил заменет со леќа , а во случајот со замена на компир процентот се зголемил на 35 %
Било утврдено дека леќата може да го успори варењето и ослободување на шеќерот во крвта, со што на крајот се намалува нивото на гликоза во крвта. Имено, бавната апсорпција не предизвикува голем пораст на нивото на гликоза, која инаку на долг рок може да означи почеток на дијабетес тип 2.
Понатаму, мешунките содржат соединенија, кои ја поттикнуваат работата на ензимите заслужни за апсорпција на гликозата, а нивните влакна може да поттикнат производство на масни киселини со краток ланец, кои, исто така, помагаат во намалување на нивото на гликоза во крвта.
Истражувачите се надеваат дека овие нови откритија ќе ги охрабрат луѓето да заменат или барем да ја додадат леќата во својата исхрана и така да го намалат ризикот од дијабетес, пишува „The Journal of Nutrition“.
