Миењето заби помага во превенцијата од Алцхајмерова болест?!

Нова американска студија детално опишува дека бактеријата P. gingivalis поврзана со болеста на непцата, е пронајдена во мозокот на пациентите со Алцхајмерова болест.

За повеќето луѓе миењето заби е само дел од дневната рутина, но дали сте знаеле дека начинот на кој ги миете забите може да биде еден од „факторите на ризик“ за развој на Алцхајмерова болест во иднината. Некои студии дури сугерираат дека ризикот за развој на Алцхајмерова болест се удвојува кога болеста на непцата трае 10 или повеќе години, пренесува Индепендент.

Новата американска студија објавена во магазинот Science Advances детално опишува како видот на бактеријата Porphiromonas gingivalis – или P. gingivalis – е поврзана со болеста на непцата, пронајдена е во мозокот на пациенти со Алцхајмеровата болест. Тестови направени врз глувци покажале дека бактеријата се проширила од устата во мозокот каде ги уништувала нервните клетки. Извештајот го финансирала фармацевтска компанија која ги истражува причините за Алцхајмерова болест и други дегенеративни пореметувања.

Првата фаза на болеста на непцата е гингивитисот кој зафаќа половина од возрасната популација. Ако не се третира, меѓу забите и непцата се формираат „џебови“ кои се полнат со бактерии и токму тие укажуваат дека гингивитиост преминува во парадонтопатија.

Иако најновите истражувања носат повеќе докази за теоријата дека болеста на непцата е една од причините заради кои може да дојде до Алцхајмерова болест, важно е да се запамети дека сите кои патат од болести на непцата не развиваат Алцхајмероца болест, ниту сите оние кои патат од оваа болест имаат проблем со непцата.

За да знаат кој е во „опасност“ научниците сега мораат да развијат тестови, а потоа стоматолозите преку совети на тие луѓе би им укажувале како да го намалат ризикот од развој на Алцхајмерова болест. Но, дотогаш се препорачува редовно миење заби и добра орална хигиена.

Истражувањата покажуваат дека Алцхајмеровата болест е поврзана со низа други состојби, а не само со болести на непцата. На тоа укажуваат и други бактерии и вирусот на херпес тип 1, кои, исто така, можат да се најдат во мозокот на заболените.

Научниците се уште се обидуваат да ја сфатат врската меѓу низа различни состојби кои можат да доведат до развој на симптомите, како што се слаба меморија и промени во однесувањето, карактеристични за Алцхајмеровата болест.