Мигрената не е обична главоболка. Меѓутоа, често така се перципира затоа што се работи за „невидлива“ болест. Пациентите често слушаат коментари од типот: „Па не толку страшно, што ти е?!“ или „Па сите имаат понекогаш главоболка!“. Луѓето околу нив често им префрлуваат дека симулираат или претеруваат…
Какво е чувството на болка од мигрена – тоа не го знае никој кој ниту еднаш не ја доживеал: нападот кој доаѓа одненадеж, без никакво предупредување. Во главата грми и сева, чувството на притисок е огромно – како дека главата ќе експлодира. Пулсирачката болка е толкава да не можеш да се концентрираш на ништо друго, а концентрирана е на едената половина од главата.
Движењата, светлината и вревата дополнително ја засилуваат. Вака личностите кои имаат мигрена го опишуваат нападот од оваа непријатна болест. Мигрената може да трае до три дена. Често ја следи и чувство на мачнина и повраќање. Не мораме ниту да споменуваме дека одењето на работа и нормалното секојдневие се невозможни. Мигрената не се вбројува без причина (според Светската здравствена организација) меѓу 20 „боледувања“ кои најмногу го ограничуваат нормалниот секојдневен живот.
Причината за мигрената сè уште е предмет на истражување. За ненадејниот непријатен напад често виновници се стресот, вревата, нередовното спиење или одредени намирници. Мозокот на пациентите кои патат од мигрена значително силно реагира на тие иритации.
„Мозокот претерано се активира, се активираат одредени нерви и делови од мозокот, па се вклучуваат некои одбранбени рефлекси“, вели д-р Хармут Гобел, стручњак за болка.
А зошто тогаш едноставно не се напијат таблета против болки?
Силните болки од мигрената ретко можат да се неутрализираат со таблета – можеби само малку да се ублажат. Редовното земање лекови против акутни болки може да има силни нуспојави, па дури и да доведе до постојани главоболки. Значи, место да ги омаловажуваме нападите на мигрена на колегите и колешките, нивната болка треба да ја сфатиме сериозно. Мигрената не е само „главоболка“ – мигрената е болест – дури и ако не може да се види „однадвор“. Најмалку што можеме да направиме е да покажеме разбирање и сочувство.
