Секојдневно за време на редовните активности на рацете може да се најдат повеќе од три илјади бактерии. Валкани раце се најчестите пренесувачи на разни болести.
Редовното и правилно миење на рацете ќе го спречи ширењето на повеќето заразни болести. Навиката за редовно миење на рацете, особено на децата, треба да им се појасни уште во раното детство, на многу едноставен начин.
Превенција од болести
Миење на рацете со сапун е една од најефикасните и најисплатливи мерки за превенција од дијареја, пневмонија, менингитис, жолтица, цревни болести, детска парализа, респираторни инфекции, грип, гнојна ангина, дифтерија, како и инфекции на ушите, очите, устата и кожата.
Со миење на рацете се намалуваат 45 проценти од случаите на болести поврзани со дијареја. Тоа се болести кои се јавуваат почесто во колективи, во детско доба, во училиште, градинка.
Колку често треба да ги миеме рацете?
Рацете треба да се мијат не само пред јадење, туку задолжително и по користење на тоалет и слични ситуации. Ако рацете не се измијат веднаш, не треба да ја допирате устата, носот, очите.
Постојат голем број на предмети преку кои би можеле да се заразите – пари, далечински управувачи, банкомати, држачи во автобус, рачки на врата и слично.
Преку контаминирани предмети и работи, кои претходно ги користел болен човек или носител на клици може да се пренесат заразни болести.
Ако сте болни, да речеме од грип, можете преку рацете да инфицирате друго лице, така што не се препорачува да кивате во раката, бидејќи подоцна со неа ќе се поздравите со некој познаник, ќе допрете други работи. Треба да кивнете во нешто каде што вирусот потешко ќе преживее, нека биде тоа лактот. Таму има ткаенина и вирусот нема да преживее долго. Исто така, помала е веројатноста дека ќе допрете некого со лактот и на овој начин ќе ја пренесете инфекцијата.
Со миење на рацете се намалуваат 45 проценти од случаите на болести поврзани со дијареја
Рацете служат како директен и индиректен пренесувач на заразни болести, а со нивното миење се намалува ризикот човек да се зарази и да ја пренесе инфекцијата на други лица.
Треба да се внимава и на садот во кој стои сапунот, кој, исто така, може да содржи микроорганизми – предизвикувачи на заразни болести, па затоа е неопходно на јавни места да се користи течен сапун, кој стои во затворени садови.
Во секојдневниот живот треба да ги миеме рацете онака како што не научиле нашите родители, едноставно со сапун и вода:
- добро насапунете ги рацете;
- мијте ги најмалку 15 до 20 секунди;
- истријте ги добро рачните зглобови, помеѓу прстите, под ноктите;
- ако рацете се многу валкани, може да се користи и мека четка;
- добро исплакнете, избришете ги рацете со чиста крпа или хартиени салфетки;
- не заборавајте дека рацете биле валкани кога сте ја пуштале чешмата, така што треба да ја затворите батеријата со вашиот лакт или да користите хартиена крпа.
