Од денес на Клиниката за неврохирургија воведена е нова метода за лекување на пациенти со мозочно крварење. Со операцијата што утрово ја направи министерот за здравство Венко Филипче заедно со неговите колеги д-р Владимир Рендевски, директор на Неврохирургија и д-р Благој Шунтов, направен е огромен исчекор во третманот на болните соочени со овој проблем.
Според министерот Филипче, операцијата е направена со нов иновативен уред – дволуменски систем кој истовремено овозможува следење на интракранијалниот притисок, испирање на коморниот систем на мозокот и дренажа на цереброспиналната течност.
Најавите се дека оваа метода, со овој систем, кој веќе континуирано се употребува во секојдневната клиничка пракса во неколку земји во светот како САД, Германија, Португалија и Холандија, од денес се става во континуирана употреба на Клиниката за неврохирургија.
Со изведувањето на овој иновативен зафат, нашата земја е единствена земја во Југоисточна Европа каде ќе се врши оваа метода.
