Лавандата вообичаено се користи за производство на парфеми и козметика, во фитотерапијата, како и во кулинарството. Сушените цветови од оваа ароматична билка содржат есенцијално масло богато со линалол и линалил ацетат.
Благодарение на своето смирувачко дејство, лавандата често се користи и кај пореметувања на сонот, несоница, нервоза, анксиозност, па дури и депресија. Лавандата, исто така, има антиспазмодичко дејство така што може да помогне при грчеви во цревата, дијареи и некои други гастроинтестинални тегоби кои се јавуваат како резултат на стрес и нервоза. Оваа билка ги ублажува и нападите на кашлање и потпомага при искашлување кај бронхитис.
