Младите и средовечни жени со вишок килограми имаат двојно поголема шанса да страдаат од инконтиненција, односно неконтролирано и неволно истекување на урина од мочниот меур, утврдиле австралиските научници. Тие утврдиле дека жените со умерено зголемена телесна тежина имаат 35 % поголема шанса за инконтиненција, додека ризикот кај жени со прекумерна тежина е двојно поголем во однос на оние со здрава телсена тежина.
Иако инконтиненцијата не е опасно здравствено пореметување, таа може значајно да влијае на квалитет на животот на жената, истакнува научниот тим предводен од Тејл Ламертон од Универзитетот Квинсленд. Но, тоа може да влијае на физичката активност, спиењето и на личните односи. Негативните здравствени последици поврзани со инконтиненцијата е чувството за физичка непријатност, велат научниците.
За да го утврдат влијанието на прекумерната телесна тежина на неспособноста за задржување на урина, научниците проучиле претходни истражувања кои содржеле податоци за телесната тежина и инконтиненцијата и кои опфаќале 47 293 жени помлади од 55 години од шест земји: Австралија, Франција, САД, Данска, Велика Британија и Холандија.
Резултатите на новото истражување покажуваат дека вишокот килограми ги изложува на ризик за инконтиненција сите жени без разлика на годините, вели Џин Кларк од медицинскиот факултет во Балтимор.
„Луѓето мислат дека тоа е нешто што ги погодува само постарите жени, но ова покажува дека може да ги погоди и помладите жени и дека вишокот килограми и гојазноста се сериозни ризик фактори,“ додава Кларк.
Проценките се дека речиси 50 % од жените во некој момент од животот страдаат од инконтиненција, а помалку од половина бараат лекарска помош.
Она што го нагласуваат научниците е фактот дека кај жените кај кои со дебелината ќе се развие инконтиненцијата, состојбата често се поправа откако ќе ги намалат килограмите.
