Поради пандемијата со коронавирусот, луѓето станаа посвесни за важноста на хигиената и одржувањето на предметите чисти. Но, што е со паметните телефони, уреди кои повеќето од нас ги држат постојано во раце или ги допираат на лице?
Најпрво добра вест: “Современите мобилни телефони не се во толкава мера ширители на микроби“, вели Маркус Егерт, професор по микробиологија и хигиена на Универзитетот Фуртванген во Германија.
“Во споредба со бројот на микроби на човечките раце, може да се каже дека нивниот број на мобилните телефони е занемарлив. За здрав човек кој користи мобилен телефон во своето домаќинство, микробите на него не претставуваат опасност“, вели Егерт.
“Современите паметни телефони се одликуваат со мазна површина, поради што на нив се ‘лепат’ помал број на микроорганизми. Тие на таквите површини нема со што да се хранат, па не успеваат ни да се размножат. Наспроти тоа, бројот на бактерии пронајдени на копчињата на старите телефони е многу поголем“, појаснува Егарт.
Тој додава дека и начинот и местата на кои го користите мобилниот влијае на тоа колку микроби на него се насобрале.
“Површината на мобилните телефони е одраз на свеста за хигиената на неговиот корисник“, вели Себастијан Клос . Сите оние кои ретко мијат раце, користат мобилен додека јадат и го носат со себе во тоалет, на својот уред ќе пренесат значајно повеќе микроби од оние кои не го прават тоа.
Експертите советуваат телефонот кога се чисти да исклучи и да се користи мека крпа од микровлакна. Доколку телефонот е многу валкан, се советува негово чистење со помош на мека влажна крпа на која сте ставиле и малку сапун.
Егерт вели дека мобилниот телефон кој не е многу валкан, не е потребно да се дезинфицира, оти новиот коронавирус се елиминира и со обичен сапун.
