Консумирањето семки во исхраната спречува појава на камења во жолчката, а истовремено го забрзуваат метаболизмот, што доведува до намалување на вишокот килограми. Сепак, со оглед на тоа што се калорични, не смеат да се јадат во преголеми количини.
Сусам
Сусамот е драгоцен извор на протеини, калциум, влакна и витамини од групата Б. Поседува дури два пати повеќе од овие корисни материи отколку другите семиња. Содржи и селен, магнезиум, фосфор и железо.
Најголеми придобивки: го штити организмот од инфекции и ги лекува мочните канали. Сусамот ги ублажува отоците и болките кои ги предизвикува ревматскиот артритис – содржи бакар и на тој начин го третира воспалението.
Употреба: сусамот треба да се јаде суров или да се користи во салати. Со пржење му се намалува нутритивната вредност, а семето станува горко. Може да се додаде во јогурт, супа или салати, леб, погачи и десерт. Од сусам се прави и специјална мешавина, која може да се купи или пак да се направи дома, а се користи како замена за штетната натриумова сол. Во сад се ставаат девет десетини сусам малку загреан на оган и лажичка чај од хималајска сол. Се ова добро се меша и се користи наместо класичната сол.
Ленено семе
Ова семе е многу помалку вкусно од другите видови и затоа е ограничена неговата улога во кулинарството.
Најголеми придобивки: освен сите наведени нутритивни вредности, овој вид семе содржи и билна слуз и влакна растворливи во вода, што помага во случај на опстипација и поттикнува празнење на цревата. Претставува добра заштита и од малигни тумори, како што покажала една студија од Германскиот центар за истражување на ракот од Хајделберг, објавена во списанието “Journal of Clinical Oncology”. Имено, лененото семе содржи фитоестрогени, кои ги уништуваат канцерогените клетки и спречуваат развој на секундарни тумори.
Употреба: доволно е секој ден да се пие чаша млака вода со две лажички ленено семе, кое сте го оставиле да отстои во чашата во текот на ноќта.
Чиа семе
Малите бели или црни семки се многу важни за нашето здравје. Спречуваат ненадејни флуктуации на крвниот шеќер, бидејќи содржат висок процент на нерастворливи влакна. Многу се корисни при држење на диета, бидејќи го одржуваат чувството на ситост.
Најголеми придобивки: го лекуваат воспалението, го регулираат крвниот притисок и го контролираат холестеролот. Го намалуваат апетитот, ја забрзуваат функцијата на базалниот метаболизам и го поттикнуваат согорувањето на мастите. Содржат повеќе омега-3 масни киселини од било кои други семиња и имаат пет пати повеќе калциум од млекото. Од витамините тука се А, Ц, Е и комплексот витамини од Б групата, минерали железо, селен, цинк, бакар и магнезиум, како и амино-киселини.
Употреба: може да се додаваат во овошни сокови, јогурт, или пак во чорби и супи, како и во салати.
Ким
Ова семе е богато со есенцијални масла, но исто така содржи и танин, масни киселини, железо, протеини и витамини. Се користи при подготвување на различни видови чај од билки, за смирување на дигестивниот тракт и е главен протагонист на кујната на Блискиот Исток и Индија .
Најголеми придобивки: кимот е познато семе кое се користи за ублажување на грчевите, го поттикнува варењето и е вистински благодет за целиот гастроинтестинален тракт. Ова семе исто така го ублажува и непријатниот и лош здив од устата. Седативно делува и при напад на кашлица ако се пие како чај.
Употреба: во кујната се користи во правење тестенини, како додаток на супите од зеленчук или како зачин во подготовка на месо.
Амарант
Ова семе доаѓа од Централна Америка и е познато како неопходна состојка на веганската и вегетаријанската исхрана.
Најголеми придобивки: семките амарант се богати со скроб и протеини: содржат околу 16,5 g протеини на 100 g производ. Исто така, богати се со лизин: 970 mg на 100 g производ, што во голема мера ги надминува дневните потреби за оваа состојка, што изнесуваат околу 800 mg. ова семе е добро за здрави коски бидејќи содржи калциум во три пати поголема количина отколку останатите жита. Исто така изобилува и со железо, витамин Ц и калиум.
Употреба: амарантот се става во супи, чорби и слично. Предлог: сварете ги семките амарант 30-40 минути, потоа испржете ги во тава со малку масло и – бум! – пред вас се нови пуканки!
