Паровите кои јадат многу морска храна имаат повеќе сексуални односи и побрзо стигнуваат до потомство од оние кои ги избегнуваат школките или сардините, покажале резултатите на најновото американско истражување.
Имено, научниците следеле 500 пара во Мичиген и Тексас во период од една година барајќи од нив да ја евидентираат консумацијата на морска храна и зачестеноста на сексуални односи. Истражувањето покажало дека изгледите за сексуален однос биле 39 отсто повисоки во деновите кога двојката консумирала морски плодови.
До крајот на годината, 92 процента од паровите кои имале најмалку двапати неделно морски специјалитети на својата трпеза зачнале дете во споредба со 79 отсто од оние кои јаделе помалку риби и школки. Врската помеѓу морската храна и плодноста останала иста и кога се земала бројката на сексуалните односи.
„Додека зголемувањето на сексуалната активност може да биде еден бихејвиорален механизам, кој го поврзува внесувањето на морска храна и повисоката плодност, тоа не е единствениот механизам“, изјавил водачот на студијата Одри Гаскинс, нутриционистка од Харвардската школа за јавно здравство во Бостон.
„Ние веруваме дека воочената врска помеѓу морската храна и плодноста, независно од сексуалната активност, може да биде последица на подобрување на квалитетот на спермата, менструалниот циклус и квалитетот на ембриони. Претходните истражувања ги забележаа позитивните ефекти на зголемениот внес на морска храна и масни киселини“, изјавила Гаскинс.
Најмалку два пати неделно јадете риба богата со омега-3 масни киселини
Лекарите советуваат пациентите најмалку два пати неделно да јадат риба богата со омега-3 масни киселини, како лосос, скуша, харинга или туна, бидејќи внесувањето на овие киселини е поврзано со намален ризик од срцев удар и мозочен удар.
На жените кои сакаат да забременат им се сугерира да не јадат повеќе од три пати неделно риба за да го избегнат изложување на жива што може да предизвика вродени деформации кај детето, а ја има многу во ајкули, сабјарки, скуша и туна.
На тоа колку често луѓето јаделе морска храна не влијаело нивното образование, приходи, вежбање или телесна тежина. Недостаток на студијата е што нема прецизна анализа на типот на риба што испитаниците ја јаделе, а што би укажало на ризикот на изложеност на жива, предупредуваат експертите. „Не се сите риби еднакви“, вели Трејси Вудруф од Универзитетот Калифорнија во Сан Франциско. „Многу сардини или инчуни се во ред, затоа што се мали и нема многу загадување во нив“, вели Вудруф. „Туната е покомплицирана, бидејќи може да содржи повеќе жива“.
