Надградбата на вештачки трепки по правило не треба да предизвика никакви проблеми, но сепак не треба да се заборави дека алергии и инфекции како на очните капаци, така и на очите може да се појават.
Основно е, велат офталмолозите, надградбата да се прави во што е можно почисти услови.
Нашата кожа не е стерилна, бидејќи на неа живеат одредени бактерии како сапрофити (не предизвикуаат болести), но ако се менува Ph на кожата или ако дојде до повреда на истата, може да станат патогени и да предизвикаат воспаление. Така, трепките кои се надоградуваат, исто така, не се стерилни, но пинцетите со кои се ставаат би требало да бидат добро дезинфицирани, бидејќи секое оштетување на површината на кожата со трепките овозможува продор на бактериите како од површината на инструментот, така и од околната кожа, па ако станува збор за поголем број бактерии, можно е да се развие воспаление на очните капаци – блефаритис.
Воспалението може да зафати еден фоликул на трепката или околните лојни жлезди на работ на капакот или да се прошири на сите места. Таквата инфекција може да предизвика испаѓање на трепките во зафатеното подрачје, како и гнојни мали јазли кои мора да се отворат и да се отстранат.
Кај инфекцијата на очните капаци се ординира со локална антибиотска терапија, а во случај на интензивна инфекција потребно е и орално консумирање на антибиотици.
Друга можност се алергиите на лепилото со кое се врши спојување на трепките, па иако вишокот лепак се остранува и мали остатоци може да предизвикаат алергиска реакција на очниот капак која треба соодветно да се лекува со терапија.
Некои трепки се исклучително долги и „тешки“, па може со еден дел да го засенат видното поле, но не можат директно да влијаат на влошување на оштрината на видот.
Симптоми на воспаление
Најважно е доколку дојде до воспаление, а тоа ќе биде изразено со болка, отоци и црвенило на рабовите на очните капаци, што побрзо да се побара лекарска помош за со навремено лекување да се спречи понатамошно ширење на воспалението.
Вештачките трепки се моден тренд од кој и не треба да се откажувате ако го сакате, нагласуваат лекарите, но најважно е надградбата да ја прави стручно лице во хигиенски услови со максимално внимание за да не дојде до оштетување на кожата на очните капаци и самото око.
