Мозочниот удар може да му се случи на секого, во било кое време и било каде. Ќе го доживее секое четврто возрасно лице. Меѓутоа, речиси сите удари може да се спречат со мерки на превенција, потенцираат лекарите.
Прв чекор, објаснува д-р Верица Краљ е да се препознаат и сфатат сопствените ризик фактори и да се заштити делувајќи на нив.
ВИСОК КРВЕН ПРИТИСОК – повеќе од половина од мозочните удари се предизвикани од висок крвен притисок. Со едноставен преглед контрола на крвниот притисок, може значително да се намали ризикот од мозочен удар.
ФИЗИЧКА АКТИВНОСТ – со придржување до препораките за минимална количина физичка активност – 30 минути умерена активност пет пати неделно – можеме да го намалиме сопствениот ризик за 25 проценти.
ПРЕКУМЕРНА ТЕЛЕСНА ТЕЖИНА – прекумерната телесна тежина е причина за секој петти мозочен удар. Луѓето со прекумерна тежина имаат 22 отсто поголем ризик од мозочен удар, додека кај обезните лица тој ризик е дури 64 отсто поголем!
ИСХРАНА – со намалување на солта, шеќерот и маснотиите, како и со зголемување на внесот на зеленчук и овошје, помагаме за одржување на соодветна телесна тежина, крвен притисок и холестерол, а со тоа значително ја спречуваме појавата на мозочен удар.
АТРИЈАЛНА ФИБРИЛАЦИЈА – неправилни, главно пребрзи отчукувања на срцето се голем ризик за мозочен удар доколку не се лекуваат. Тие се почесто фатални или резултираат со сериозни оштетувања.
ПУШЕЊЕ – повеќе од десетина случаи на мозочен удар се поврзани со пушењето. За да ги зголемите шансите за успешно откажување на цигарите, корисно е да се побара помош од стручно лице.
АЛКОХОЛ – намалувањето на внесот на алкохол на две единици дневно за мажи и една единица за жени, исто така, ќе го намали и ризикот од мозочен удар.
ХОЛЕСТЕРОЛ – повеќе од една четвртина од случаите на мозочен удар се поврзани со високо ниво на “лош“ (ЛДЛ) холестерол. Нивото на холестерол може да се контролира преку исхрана, начин на живот и лекови.
ДИЈАБЕТЕС – секое петто лице кое ќе доживее мозочен удар е дијабетичар, а тие притоа имаат пофатални последици од мозочниот удар во споредба со општата популација. Намалувањето на ризикот од дијабетес и контролата на гликемијата, исто така, ќе го намалат ризикот од мозочен удар.
ДЕПРЕСИЈА И СТРЕС – дури еден од шест мозочни удари е поврзан со менталното здравје. Депресијата и стресот го зголемуваат ризикот од помали мозочни удари, особено кај повозрасните луѓе.
