Агорафобијата е пореметување кое првично означува страв од отворен простор. Под овој поим се подразбира група на стравови поврзани со јавни места, отворен простор и голем број луѓе, а често започнува со напад на паника. Симптомите обично се напнатост, вртоглавица, форма на компулсивна проверка, страв од губење на разумот и депресија.
Ова пореметување чини 60 проценти од сите фобии откриени со клинички прегледи, а од нив страда 0,8 отсто од светската популација. Лицата кои имаат симптоми ретко тоа го признаваат на околината и избегнуваат било каков разговор на таа тема.
ЕВЕ КАКО КОВИД-19 МОЖЕ ДА ЈА ВЛОШИ СОСТОЈБАТА
Се повеќе време минуваме во затворен простор или поради карантин или за да го намалиме ризикот од зараза. Стана и многу непријатно да се биде опкружен со луѓе кои не носат маска бидејќи сите веќе се прашуваме колку таквото однесување е небезбедно. Додека влијанието на изолацијата на менталното здравје може да варира од лице до лице, кај оние кои веќе страдаат од анксиозност или не сакаат да бидат опкружени со луѓе, тоа сигурно е многу поголемо.
“Изолацијата поради пандемијата сигурно може да го засили чувството на анксиозност кај оние кои страдаат од агорафобија, страв од одвојување…“, вели Јип Псај, клинички психолог на Медицинскиот факултат во Лос Анџелес.
Агорафобијата е вид на анксиозно пореметување во кое лицето ќе избегнува места и ситуации од кои не може да побегне. Ќе избегнува гужва, трговски центри, јавен превоз… Ова пореметување обично се јавува со панични напади.
Некои луѓе ќе си помогнат така што ќе останат дома, но исто така кај некои токму изолацијата може да ја влоши состојбата.
НЕГАТИВНИ ПОСЛЕДИЦИ
Колку подолго трае пандемијата, поголемо ќе биде влијанието на луѓето кои не сакаат да излегуваат од дома, вели Керол Либерман, психијатар.
“Речено ни е дека е опасно да се излегува од дома на места каде може да се собираат голем број луѓе, па заканата ни се чини уште посериозна. Повеќето луѓе се прилагодија и некако им премина во навика повеќе време да минуваат дома. Тоа вклучува и работа од дома“, вели таа.
“Кога ќе погледнеме низ прозор ни се чини дека е потребно многу повеќе енергија за да се излезе надвор и да се извршуваат обврски“, подвлекува д-р Либерман и додава дека умешноста за интеракција со други луѓе е како мускул кој треба да се вежба. Поради маските, стравот од тоа како денес треба да се контактира со други, социјалните вештини не се добри како што беа.
КОГА ТРЕБА ДА СЕ ПОБАРА ПОМОШ?
Во моментов, поради пандемијата, на сите ни се чини дека нашите стравови и анксиозните состојби се нормални. Запрашајте се колку вознемиреност е нормално? Побарајте стручна помош ако:
• Сакате да се вратите дома веднаш штом ќе го поминете прагот
• Анксиозноста ги попречува односите со пријателите и семејството
• Постојано барате лоши вести на социјалните мрежи и портали
