Може ли претераната консумација на овошје да биде штетна?

Експертите за исхрана препорачуваат внесување на што е можно повеќе овошје и зеленчук, но прашањето е дали постои мерка за овошје и која е таа?

Имено, токму Стив Џобс, коосновачот на „Епл“ беше познат по неговата исхрана, која се базираше на овошје, верувајќи дека тоа го чисти организмот од штетните токсини. Но, актерот Ештон Кучер, кој ја прифати диетата со овошје на Џобс, на крајот заврши во болница поради проблеми со панкреасот, што покрена сомнежи дали е навистина добро да се јаде многу овошје.

„Главната грижа кај прекумерното внесување овошје е природниот шеќер. Иако овошјето главно содржи доста шеќери, истражувањата постојано ја поврзуваат консумацијата на целите плодови со намален ризик од развој на дебелина и други метаболички болести“, изјавил д-р Роберт Лустиг, автор на книгата за исхрана „Fat Chance“.

Овошјето, исто така, содржи и други состојки кои го намалуваат ризикот од повисок внес на шеќери, пишува „Тајм“. Како што објаснува д-р Лустиг, тоа содржи растворливи и нерастворливи влакна. Заедно, овие два вида на влакна формираат некој вид на „решетки“ во внатрешноста на дуоденумот во тенкото црево. „Решетките“ спречуваат значителен дел од овошниот шеќер да се апсорбира порано за време на процесот на варење.

„Како и запирање на брановите на цунами, правејќи подводен ѕид оваа бариера ја ограничува апсорпцијата на шеќер, така што не го оптоварува црниот дроб“, објаснил д-р Лустиг.

„Вашето црево го сигнализира мозокот дека сте сити кога она што сте го изеле ќе го наполни вашиот трет дел од тенкото црево – илеум. Тогаш влакната им помагаат на молекулите на храната побрзо да го пополнат илеумот, поради што побрзо ќе се чувствувате сити во споредба со тоа кога би јаделе храна без влакна“, објаснил докторот.

Сепак, прекумерната консумација на овошје, предупредува овој експерт, има и свои недостатоци. Прекумерното внесување на свежо овошје може да предизвика дијареја.