“Сигурно може истовремено да се добие и грип и коронавирус, а тоа ќе има катастрофални последици за имуниот систем“, вели д-р Адриан Буроус, лекар по семејна медицина од Флорида.
Всушност, ако се заразите со едната болест, би можеле да бидете посклони кон инфекција со другата болест.
“Кога ќе се заразите со грип и други респираторни вируси, вашето тело слабее и станувате ранливи, затоа е многу едноставно да се добие и друга инфекција“, вели д-р Сема Јасмин.
И грипот и новиот коронавирус може да ги нападнат белите дробови и да предизвикаат воспаление, насобирање на течности, па дури и затајување на системот за дишење, а во потешките случаи може да предизвикаат сепса, срцеви проблеми, како и воспаление на мозокот, мускулите и срцето.
Двојната зараза може да предизвика сериозни долготрајни последици на сите тие органи, вели Мајк Метхај, професот по медицина на Универзитетот Калифорнија.
Меѓутоа, се уште е прерано за да се утврди дали двојната инфекција е полоша од заразата само со коронавирус.
КАКО ДА СЕ РАЗЛИКУВААТ СИМПТОМИТЕ?
“Симптомите на грип и коронавирус се многу слични, така што е тешко да се разликуваат“, вели д-р Леонард Мермел од одделот за епидемиологија и контрола на зарази во болницата Rhode Island.
Симптомите на двата вируса вклучуваат зголемена телесна температура, вртоглавица, замор, воспалено грло, болки во мускулите, недостаток на воздух и течење на нос. Но, за разлика од грипот, КОВИД-19 може да предизвика и губење на осетот за мирис и вкус, а околу половина од случаевите на пренесување на заразата се случува помеѓу луѓе кои немаат никакви симптоми, порачуваат од Американската агенција за контрола и превенција на болести (CDC).
Најдобар начин со сигурност да се знае дали лицето има коронавирус или грип е тестирање, а најдобра превенција да не дојде до зараза е носење маска и вакцинација против грип.
