Мозокот поминува низ пет различни фази во текот на животот на една личност, со клучни пресвртници на возраст од 9, 32, 66 и 83 години, според најновата студија на научници од Универзитетот во Кембриџ.
Резултатите, базирани на скенирање на мозокот на околу 4.000 луѓе на возраст до 90 години, беа објавени во списанието „Nature Communications“, а како што се покажа, адолесценцијата – периодот на клучни промени во мозочните врски, не завршува во тинејџерските години, туку трае до раните триесетти години, објавува BBC.
Според авторот на студијата, Алекси Мосли, „мозокот се развива во текот на целиот животен век, зајакнувајќи ги и ослабувајќи ги врските во различни фази“.
Научниците идентификуваа пет фази во мозокот – детството – до девет години – период на брз развој на мозокот, додека се намалува големиот број синапси формирани рано во животот.
Потоа следи периодот на адолесценција, од девет до 32 години – најголемиот скок во ефикасноста на мозочните врски, како и ризикот од ментални нарушувања.
Возраст од 32 до 66 години – стабилна фаза со побавни промени, за време на која ефикасноста на невронската мрежа почнува малку да опаѓа.
Рано стареење – од 66 до 83 години – мозокот сè повеќе се одвојува на функционални региони, што може да биде поврзано со појава на деменција и кардиоваскуларни проблеми.
Последната фаза на развој е доцното стареење од 83-годишна возраст, кога има продлабочување на промените од претходната фаза, со помалку достапни податоци поради помалиот број здрави испитаници на оваа возраст.
Професорите кои учествувале во истражувањето оценуваат дека резултатите се „многу интересни“ и дека се вклопуваат во постојното знаење за развојот на мозокот и стареењето, забележувајќи дека индивидуалните разлики остануваат значајни.
Според авторите, студијата би можела да помогне подобро да се разберат промените во ризикот од ментални нарушувања и деменција во текот на животот.
