Стискањето мозолчиња никогаш нема да го препорача ниту еден дерматолог, но сепак повремено секој од нас потклекнува. Сепак, доколку имате мозолче на ова место ни случајно не чепкајте го – може да биде многу, многу опасно! Дерматолозите овој дел од лицето го нарекуваат „триаголник на опасноста“, а го вклучува делот меѓу устата и носот, па се до самиот корен од носот, меѓу веѓите.
Зошто не е препорачливо да се чепкаат мозолчињата на овој дел од лицето? Затоа што ризикот од инфекции е повеќекратно зголемен заради големата концентрација на вени која се наоѓа на овој потег од лицето, а тие водат директно до кавернозниот синус – најопасниот дел од телото за инфекции или тумори, затоа што низ него поминуваат многу важни структури. Низ кавернозниот синус поминува и каротидата, најважната артерија која доведува крв во мозокот. Ако инфекцијата доволно се проширила или се јави емболизам како резултат на неа и тоа влијае на дотокот на крв во мозокот, мошне лесно може да дојде и до мозочен удар.
Се разбира, денес кога антибиотиците ни се достапни на секој чекор, овој триаголник на опасност е многу помалку опасен, но тоа не значи дека е сосема безопасен.
„Кога некоја сериозна инфекција на овој дел од лицето би поминала нетретирана, теоретски би можело да дојде до смртен исход“, вели доктор Џереми Брауер, дерматолог, за магазинот “Men’s Health”, додавајќи дека антибиотиците сепак ја спасуваат работата.
„Симптомите на инфекцијата вклучуваат црвенило, крвавење и постојано создавање гној. Ако не се повлекуваат, појдете на лекар“, додава доктор Брауер.
