Доколку често имате болки или грчеви во мускулите, освен одмор, благо истегнување и масажа од голема помош би можеле да ви бидат и одделни лековити билки, намирници, како и некои витамини и минерали.
Маслото од камилица, на пример, доколку се нанесе на болни и напнати места брзо им помага на мускулите да се опуштат. Исто така, и капсаицинот од лутите пиперки е честа состојка на мастите против болки со оглед на тоа дека природно ја поттикнува мускулната релаксација. Особено може да им биде од помош на личностите кои болуваат од ревматски артритис и фибромиалгија.
Причина за честите грчеви во мускулите може да биде и недостатокот на витамин Д. За на својот организам да му обезбедиме доволно витамин Д се препорачува секојдневно кусо изложување на сонце (најмногу неколку минути ако не користите лосиони со УВ фактор), но и земање диететски суплементи со витамин Д.
Магнезиумот е особено важен за нормална мускулна и нервна функција и еден од главните совети кај мускулна напнатост и грчеви е да се зголеми внесот на магнезиум. Освен во додатоците на исхраната, магнезиумот го има и во бананите, бадемите, семките од сончоглед и мешунките.
