Терапијата со музика, која вклучува пеење, ритмично удирање и слушање музика има огромно позитивно влијание на пациентите, особено по некој оперативен зафат, се наведува во истражувањето објавено во стручното списание на американските ортопеди American Journal of Orthopedics.
Истражувачите во болницата Монт Синаи во Њујорк истражиле како музиката делува на опоравување по операција на карлицата кај 30 испитаници, на возраст од 40 до 55 години.
Терапијата со музика почнала 72 часа по хируршката интервенција, а била комбинирана со стандардната постоперативна нега. Испитаниците изјавиле дека музиката им помогнала при ублажување на болките и анксиозноста во деновите по операцијата.
И претходно една голема студија на британски научници ја отвори вратата на музиката во болничките оддели. Имено, тие заклучиле дека на пациентите треба да им се овозможи да изберат музика која ќе свири пред и по операцијата, бидејчи значително ја намалува анксиозноста и потребата за лекови против болка, а истовремено го намалува ризикот за превисок крвен притисок и забрзана работа на срцето и тоа за 40 %, што е докажано со друго истражување на Универзитетот во Цирих.
Позитивното влијание било изразено кај пациентите кои сами си ја бирале музиката што ќе ја слушаат.
„Музиката не е инвазивна, безбедна е и евтина интервенција која би требало да биде достапна на сите кои ќе бидат оперирани“, вели д-р Кетрин Мидс, дел од истражувачкиот тим.
