Не мора да бидете музичар за да можете да уживате во нотите и да ја почувствувате нивната сила. Слушањето музика помага да се концентрираме и ја намалува тензијата и депресијата, а се верува дека за тоа се одговорни вибрациите кои создаваат баланс во нашето тело.
Лек за несоница
Лесна музика може да ви послужи како приспивна песна ако имате проблем со несоница. Според студијата објавена во магазинот „Holistic Nursing Practice“, музиката може да му помогне на возрасен човек да потоне во сон. Исклучете ги светлата во собата и пуштете некоја балада или класична музика.
Намалете го стресот со музика
Слушањето музика во голема мера може да го намали нивото на кортизол (хормон на стресот) во телото. Со помош на музиката можете да се борите против депресија и нервоза, а, исто така, можете да се одморите и од напорен работен ден
Мотивација за тренинг
Слушањето на вашата омилена музика за време на тренинг ја подобрува мотивацијата која ви е потребна за да го одработите правилно тренингот до крај. Исто така, луѓето што слушаат музика додека вежбаат помалку се фокусираат на напорот што доаѓа со вежбањето. Овој вид на деконцентрација може да ги подобри вашите перформанси за дури 15 проценти.
Мозокот подобро функционира со музика
Резултатите од истражувањето укажуваат на тоа дека слушањето музика го поттикнува производството на серотонин, невротрансмитер во мозокот кој го регулира расположението, апетитот и спиењето.
