На многу комплексна, речиси единствена операција на пресадување на двете белодробни крила бил подложено 18-годишно момче во болницата Пoликлинико ди Милано во градот Милано, откако се заразил со КОВИД-19.
Белите дробови му биле “изгорени“ поради коронавирусот и единствена можност за спасување на момчето, кое италијанските медиуми го нарекуваат Франческо (името е измислено за да се сочува приватноста), била наоѓање и пресадување на други бели дробови.
Франческо бил хоспитализиран на 3. март во миланската болница Сан Рафаел, прво на одделот за интензивна нега, а потоа на одделот за реанимација, каде дишел со помош на респиратор. Ден претходно на 2. март, тој имал висока температура, а епидемијата со КОВИД-19 во Ломбардија избила дури две недели подоцна. Тој прво два месеца бил во фармаколошка кома. Потоа бил префрлен во Поликлинико ди Милано, каде го оперирал проф. Марио Носоти со својата екипа. Проф. Носоти е директор на Школата за специјализација за торакална хирургија на државниот универзитет во Милано.
“Белите дробови на момчето изгледаа дрвени, неверојатно тешки и на некои места целосно уништени“, вели проф. Носоти.
Оваа операција на пресадување е прва во Европа (само во Кина е направена иста интервенција на пресадување на заболен од КОВИД-19), а освен тоа покажува и како млада здрава личност може тешко да заболи од новиот коронавирус. Неговите бели дробови сега ќе се проучуваат.
Екипата на проф. Носоти била специјално заштитно опремена, за да се избегне евентуална зараза на некој од медицинскиот персонал. Пресадувањето е направено пред 10 дена, успешно е, барем како што засега тврдат лекарите.
Процесот на опоравување на момчето, кое веќе е негативно на новиот коронавирус, ќе потрае подолго време, бидејќи тој два месеца бил во фармаколошка кома, што остава траги и кај млад човек.
