Министерството за здравство и годинава, исто како и лани, нарача 40.000 дози четиривалентни вакцини против сезонски грип. Како и досега, и овие вакцини ќе бидат бесплатни, а се наменети за ризичните групи.
Кога точно ќе почне вакцинацијата се уште не е најавено, она за кое информираше ресорното министерство е дека од вчера почна пријавувањето за имунизацијата против инфлуенца. На страницата vakcinacija.mk, сите лица кои имаат зголемен ризик од компликации од грипот, ќе можат да се пријават.
Во овие групи спаѓаат лица над 65 години, лица со хронични заболувања, здравствени работници, бремени жени и децата на возраст од 6 месеци до 5 години.
Откако ќе ја пополнат формата, заинтересираните се регистрираат за вакцинација директно во системот Мој Термин. Согласно распоредот предвиден во планот за вакцинација, по пат на СМС ќе добијат информација за точниот датум и час кога треба да се вакцинираат на пунктот кој ќе го изберат при регистрацијата.
“Вакциницијата против грип не штити од КОВИД – 19, но е многу значајна во услови на пандемија со КОВИД-19 и влијанието на здравствениот систем. Во состојба на олабавување на рестриктивните мерки кога се враќаат социјалните контакти и патувањата се зголемува ризикот од ко-циркулација на Ковид 19 и грип. Со тоа може да очекуваме оптоварувањето од сезонскиот грип да биде надополнето со оптоварувањето од КОВИД-19. Ризичните групи за грип, се истите кои се под најголем ризик и од КОВИД-19, поради што им се препорачува вакцинација против грип. На тој начин ќе се избегне и дополнително оптоварување на здравствениот систем, бидејќи лицата заболени од грип би се хоспитализирале во ковид центрите“, потенцираат од Министерството за здравство.
За тоа на која вакцина во овој период од годината треба да и се даде предност, дали на онаа против грип или пак на онаа против КОВИД-19, експертите велат:
“Лицата кои се вакцинирале или допрва ќе се вакцинираат против КОВИД-19, немаат никакви пречки да примат и вакцина против грип, независно од производителот на ковид вакцините. Со други зборови, ако лицето на кое му е индицирано да ги прими двете вакцини, не е возможно истовремено да му се даде вакцина против грип и вакцина против болеста КОВИД-19. Препорачливо е да се применат овие две вакцини на растојание од најмалку 14 дена, но не е погрешно ниту да се применат на помало временско растојание. Лицата кои не се вакцинирани или не се ревакцинирани против КОВИД-19, а сакаат да се вакцинираат и против грип, во овој момент предност би требало да дадат на вакцинацијата против болеста КОВИД-19“.
Од Министерството нагласуваат дека не е доцна, граѓаните да се вакцинираат против грип во ноември или декември, бидејќи согласно епидемиолошките податоци, оваа болест во последните десетина сезони го достигнува пикот кон крајот на месец февруари.
Поради зголемената побарувачка на вакцини против грип на глобално ниво, се прават напори количините на вакцини да пристигнат во што побрз рок.
ЗОШТО ДА СЕ ВАКЦИНИРАТЕ ПРОТИВ ГРИП?
Вакцинацијата против грип е најдобриот начин да се намали ризикот од болести и компликации од грипот, кај лица кои поради здравствената состојба или возраста имаат зголемен ризик од компликации. Исто така, со вакцинирање против грип, покрај лична заштита, можете да заштитите од грип или да ја намалите можноста за пренесување на болеста на друго лице, особено на оние на кои грипот може да биде сериозна болест со компликации, а не можат да се вакцинираат поради некои причини.
ШТО Е ГРИП И КОЈ ИМА НАЈГОЛЕМ РИЗИК ОД КОМПЛИКАЦИИ?
Грип е заболување кое го предизвикува вирусот на инфлуенца и ги зафаќа горните дишни патишта: нос и грло, а во потешките форми и долните дишни патишта – бронхиите. Секоја година со вирусот на грип се заразуваат од 5% до 15% од населението. Кај поголем дел од луѓето, грипот проаѓа како релативно лесно заболување, но одредени лица се изложени на поголем ризик за сериозни компликации кои може да доведат до потреба за болничко лекување, а во некои случаи и до смрт.
КАКО ДА СЕ ЗАШТИТИТЕ ОД СЕЗОНСКИ ГРИП?
Грип (инфлуенца) е заразна респираторна болест предизвикана од вирусот на грип. Може да предизвика блага до тешка болест, а понекогаш може да доведе и до смрт. Грипот е различна од настинка. Грип обично доаѓа наеднаш. Луѓето кои се болни од грип често чувствуваат некои или сите од овие симптоми:
- Треска
- Кашлица
- Воспалено грло
- Тежок или затнат нос
- Болки во мускулите или телото
- Главоболки
- Замор
- Некои болни може да имаат повраќање и дијареа, иако ова е почесто кај децата отколку кај возрасните.
Повеќето луѓе кои добиваат грип ќе се опорават за неколку дена или најмногу до две недели, но некои луѓе ќе развијат компликации (како што се пневмонија) како резултат на грип, од нив некои може да бидат опасни по живот и да резултираат и со смрт.
Воспаление на синусите и инфекции на увото се примери на умерени компликации од грип, додека пневмонијата е сериозна компликација на грип која може да настане како резултат на самостојна инфекција со вирусот на грип или од ко-инфекција од вирусот на грип и бактерии. Други можни сериозни компликации предизвикани од грип може да вклучуваат: воспаление на срцето (миокардитис), мозок (енцефалитис) или мускулни (миозити, рабдомиолиза) ткива и мулти-органски оштетувања (на пример, белодробна и бубрежна слабост). Грипот, исто така, може да ги влоши хроничните медицински проблеми. На пример, луѓето со астма може да доживеат напади на астма додека имаат грип, а луѓето со хронични срцеви заболувања може да доживеат влошување на оваа состојба предизвикана од грип.
