Истражување во кое учествувале 210 средовечни мажи и жени покажало дека на жените им треба повеќе сон отколку на мажите, како и дека припадничките на понежниот пол имаат поголеми здравствени проблеми поради недостатокот на сон.
„Резултатите откриваат дека недоволниот сон кај жените е тесно поврзан со високите нивоа на психичка болка и посилно чувство на непријателство, депресија и лутина. Од друга страна, пак, овие чувства не се поврзани со нарушување на спиењето кај мажите“, вели професор Џим Хорн од британскиот истражувачки тим од Универзитетот на Лоубороу кој го спровел истражувањето.
Една од главните функции на спиењето е да му овозможи на мозокот да се освежи и обнови. Стручњаците велат дека при длабок, цврст сон, кортексот – делот од мозокот одговорен за помнењето, меѓу другото, се одвојува од сетилата и на тој начин се обновува.
„Колку повеќе го користите мозокот во текот на денот, толку повеќе спиење ви треба, за тоа освежување на мозокот“, додал професорот Хорн.
