Најавените агресивни временски промени претставуваат сериозен стрес на кој телото се обидува да се прилагоди, а тие неповолно ќе влијаат на здравјето особено на хроничните и срцевите болни. Стручњаците советуваат хроничните болни да си ја проверат терапијата со своите лекари и да ја ускладат со климатските промени.
Наглото заладување предизвикува собирање на крвните садови, што кај најзагрозените – хроничните и срцевите болни – може да доведе со влошување на постоечката болест. Симптоми кои можат да се јават при вакви промени се: болка во градите и главата, поспаност, вртоглавица, срцебиење, раздразливост и губење на концентрацијата. Постарите лица, како и хроничните и срцевите болни, особено треба да видат сметка и да ја ускладат терапијата, затоа што во спротивно може да дојде и до колапс на организмот.
Превентивата во вакви ситуации се базира на умереност.
Лесната исхрана и понатаму е актуелна, потребно е некое време организмот да се навикне на температурните промени, па овошјето и зеленчукот може да се од голема корист. Внесувањето доволно течности, во вид на вода, чај и цедени сокови, исто така, се препорачува. Физичката активност е добра доколку е умерена, а добриот и квалитетен сон од осум часа е неизоставен доколку сакаме организмот да ги поднесе промените кои следуваат. И изборот на гардероба е битен фактор во чувањето на здравјето. Затоа внимавајте!
