Алергијата е необичен и несоодветен одговор на нашиот имунолошки систем на различни фактори од животната средина.
Кога храната, природата, дрвјата, сонцето, играта со домашните миленици, всушност, сето она во кое треба да уживаме во секојдневниот живот станува проблем за нашето здравје, тогаш можеме да зборуваме за алергии.
Алергиите спаѓаат во најчестите здравствени проблеми на современиот свет, а бројот на луѓе кои се соочуваат со овој проблем, постојано се зголемува. Се манифестираат како реакција на хиперсензитивност на факторите од животната средина, кои се наречени антигени или алергени и се манифестираат во многу различни форми.
Најчестите алергиски манифестации се:
- кожни алергии
- респираторни алергии
Кога се јавуваат
Најголем број на чувствителни луѓе имаат симптоми во рана пролет и кон крајот на летото и почетокот на есента. Најчестите симптоми се кивање, зголемен секрет од носот, чешање на носот, насолзени очи…
Со доаѓањето на пролетта почнуваат да цветаат и првите дрва и растенија и тоа е периодот кога многу луѓе се погодени од алергиски ринитис и други алергиски манифестации.
Алергенот влегува во носот со вдишување, го дразни имунолошкиот систем и кај алергиски „предиспонираните“ лица предизвикуваат алергиско воспаление на слузницата на дишните патишта.
Олеснете ги тегобите
Склоноста кон алергии е честопати наследена. За да се манифестираат некои од алергиските болести кај овие личности, потребен е одреден период за развој на хиперсензитивност на некој надворешен фактор. Овој процес се нарекува сензибилизација и се карактеризира со формирање на антитела во организмот на алергичното лице, кои се насочени против некој надворешен фактор (алерген).
Доколку и двајцата родители се склони кон алергии, поголема е веројатноста дека ќе ги имаат и нивните деца.
Експертите велат дека влијанието на околината и начинот на живот се едни од факторите кои влијаат на развојот на алергии.
За да се заштитите пожелно е да не ја сушите облеката надвор на воздух во време на високи концентрации на полен, да го прекривате креветот и да ги затворате прозорците во екот на опрашување.
Исто така, одбегнувајте излегување во природа кога е сончево и ветровито, а по престојот на отворено, по враќањето дома, се препорачува да се измијат рацете, да се истуширате, да ја измиете косата и да ја промените облеката, со цел да се спречите внесувањето на полен во просторот во кој живеете.
