Стресот дефинитивно стана најчеста болест на денешницата. Не може да се избегне – постојано сме на него изложени, почнувајќи од утринскиот сообраќаен метеж, хаос на работното место, 100 работи кои треба а се извршат само со две раце, прекувремено работење и неможност да се остави време за себе.
Она што е посебно загрижувачки, е дека многумина не можат стресот да го држат под контрола, а за тоа покажуваат бројни научни истражувања,а тоа може да доведе до сериозни здравствени состојби како дијабетес, висок притисок, холестерол и дебелина.
И додека многумина веруваат дека стресот го намалува апетитот, тој го прави спротивното. Прекумерната изложеност на стрес води до зголемено лачење на хормонот кортизол кој го зголемува апетитот. Дебелината не е проблем само на возрасните, туку се јавува и многу порано во животот и носи долгорочни последици по здравјето.
Дебелината во Меѓународната класификација на болести се дефинира како болест прикоја доаѓа до прекумерно таложење на масно ткиво во организмот. Таа е ризик фактор за појава на пет најчести хронични незаразни болести: кардиоваскуларни, хронично опструктивни белодробни болести, тумори, ментални пореметувања и дијабетес тип 2.
Неспорен е фактот дека забрзаниот начин на живот и преголемата изложеност на стрес водат до лоши животни навики кои се погодни за развој на наведените болести. Но, тоа не значи дека работите не може да се држат под контрола. Медитацијата последите години се препорачува како идеално решение, која освен што помага при болести на срцето, го намалува крвниот притисок чувството на напнатост, го поттикнува имуниот систем и ги намалува воспаленијата. Едно од наједноставните и најдостапни решенија во борбата против стресот е дишењето. Со примена на едноставни техники на дишење значително може да се намали неговото негативно влијание и да се спречи да ја превземе контролата над организмот.
Она што е најважно е да се реагира на време и да се одвои време еднаш годишно да се направи систематски преглед.
