Речиси двојно повеќе лица се примени во болница поради КОВИД-19 при пикот на пандемијата отколку поради грип во пикот на минатогодишната сезона, покажало истражување на француските национални податоци, објавена во списанието The Lancet Respiratory Medicine. Во бројки тоа изгледа вака: 89.530 пациенти со КОВИД-19 наспроти 45.819 такви кои добиле грип.
Студијата ги споредувала податоците на пациенти со КОВИД-19 примени во болница во текот на пролетта оваа година со пациенти примени во текот на ланската епидемија на грип. Стапката на смртност била речиси трипати поголема, откриле истражувачите. Починале 15.104 пациенти заболени од КОВИД-19 (16,9%) наспроти 2640 од 45.819 пациенти примени во болница поради грип (5,8%). Притоа, поголем процент од болните со КОВИД-19 доживеале сериозна болест која бара интензивна нега од оние со грип.
Авторите забележале дека разликата во стапката на хоспитализација делумно е последица на постоечкиот имунитет во популацијата, било како резултат на претходни инфекции или вакцинација. Спротивно на тоа, КОВИД-19 е нов вирус кај кој би се очекувало многу малку луѓе да имаат претходен имунитет. Сепак, тие велат дека нивните наоди ја засилуваат важноста на мерките за спречување на ширење на двете болести и дека се посебно релевантни оти неколку земји се подготвуваат за преклопување на пандемијата со КОВИД-19 со избивање на сезонскиот грип.
“Досега најголема споредба на двете болести потврди дека КОВИД-19 е далеку посериозна болест од грипот“, вели водачот на истражувањето Кетрин Квантин од Националниот институт за здравствени и медицински истражувања.
“Посебно зачудува откритието дека стапката на смртност од КОВИД-19 е три пати поголема во однос на сезонскиот грип која минатата година беше најлоша во последните пет години по бројот на смртни случаи“.
Истражувањето покажало дека пациентите со КОВИД-19 имале двојно поголема веројатност дека ќе бидат приклучени на респиратори. Кај КОВИД-19 тоа му се случило на секој десетти пациенти, додека на респиратор завршиле четири проценти од грипозните пациенти. Заболените од КОВИД-19 на оддделите за интензивна нега престојувале дупло подолго од оние со грип, 15 односно осум дена.
Најмалку секој четврти болен со КОВИД-19 доживеал акутно респираторни затајување (27,2%), а тоа му се случило на секој петти пациент со грип (17,4%).
Најчеста основна здравствена состојба меѓу пациентите примени со КОВИД-19 бил висок крвен притисок (33,1%), прекумерна телесна тежина (11,3%) и дијабетес (19%).
Истражувачите забележале дека со КОВИД-19 се хоспитализирани помалку деца (1,4%) во однос на грипот (19,5%). Но, меѓу оние помали од пет години имало повече кои поради КОВИД-19 завршиле на интензивна нега, отколку оние со грип – 2,3%, односно 0,9%.
Стапката на смртност од КОВИД-19 не била повисока од онаа за грип во оваа возрасна група и останата е многу ниска. Од КОВИД-19 во Франција починале три деца, а од грип вкупно 13.
