Ако се плашите од грип или настинка, покрај чај, мед и лимон, секако, јадете и лук. Тој го зајакнува имунитетот, а поради антибактериските, антивирусните, антигабичните, антипаразитските и антиоксидантните својства ќе ги држи инфекциите подалеку од вас. Единственото негативно влијание од употребата на лукот е лошиот здив по неговото консумирање.
Студиите потврдуваат дека лукот може да послужи како одлична превенција од многу болести, вклучувајќи и некои видови на рак. Дел од неговите лековити дејства потекнуваат од супстанцата која прави карактеритичен и многу непријатен мирис. Причината поради која силниот мирис на лукот останува толку долго после јадењето е затоа што при варењето на храната, во крвотокот се ослободуваат соединенија на сулфур од лукот. Затоа, освежителните води за уста не се од корист како помош за прикривање на миризбата. Но, некои природни намирници се.
Истражувачите тврдат дека со лукот или после консумирањето лук, треба да се јаде јаболко, зелена салата, цикорија, целер, компир, магдонос, нане, босилек или печурки, бидејќи тие намирници содржат феноли – соединенија кои во хемиската реакција ќе реагираат со сулфурот од лукот и така ќе ја неутрализираат силната миризба.
Тоа го докажале со спектрометар, уред кој ги анализира молекулите врз основа на нивната маса, а по консумацијата на споменатите намирници, нивото на сулфур е значително многу помало во здивот. Најмногу феноли има во нането, но научниците ги изненадил и листот од зелена салата, која има далеку помали количини на феноли, а ефикасно го неутрализира мирисот на лукот.
