Делта сојот на коронавирусот, кој потекнува од Индија и од таа земја создаде хаос и стравични човечки жртви, на големо се шири и во Европа, а стигна и во Македонија. Новата варијанта на коронавирусот се шири околу 60 отсто побрзо од оригиналниот сој на вирусот, а колкав страв предизвикува најдобро илустрира фактот дека Јапонија во Токио прогласи вонредна состојба две недели пред почетокот на Олимписките игри кои ќе се одржат без публика, исто така поради ширење на новиот сој.
Порталот Business Insider подготви преглед на сите студии кои ја проучувале ефикасноста на вакцината против новиот сој и дошол до интересни податоци кои зборуваат дека глобалната слика не е црно-бела.
БРИТАНСКА СТУДИЈА: Фајзер 88% ефикасна, АстраЗенека 60%
Британска студија од мај покажува дека оние кои се вакцинирани со две дози Фајзер и АстраЗенека се “силно заштитени“ од делта сојот две недели откако ја примиле втората доза. Притоа, и АстраЗенека и Фајзер се 33 отсто ефикасни со примена само една доза.
КАНАДСКА СТУДИЈА: Фајзер 87% ефикасна, Модерна 72% по првата доза
Канадска студија објавена минатиот викенд говори дека две дози вакцина се еднакво ефикасни против делта сојот како што биле против алфа (кој потекна од Велика Британија). Оваа студија сепак треба да се земе со резерва, оти се уште не поминала стручна рецензија.
Таа покажува и дека Фајзер е 57% ефикасна по првата доза, додека АстраЗенека е 67% ефикасна две недели по примање на првата доза, додека Модерна е 72% ефикасна, исто по првата доза. Истражувачите велат дека немало доволно податоци за да се види ефикасноста на Модерна и АстраЗенека по втората примена доза.
ИЗРАЕЛСКА СТУДИЈА: Фајзер е ефикасна 64% по двете дози
Израелското министерство за здравство во понеделникот објави дека вакцината на Фајзер малку послабо штити од делта сојот отколку што сугерирале претходните податоци. Според Израелците, Фајзер е ефикасна 64 проценти по две дози.
ШКОТСКА СТУДИЈА: Фајзер вакцината ефиксна 79% по втората доза, АстраЗенека 60%
Студија објавена во Шкотска во престижното медицинско списание „Лансет“ вели дека Фајзер обезбедува „многу добра“ заштита од делта сојот која изнесува 79 проценти две недели по примање на втората доза. Под исти услови, велат научниците, АстраЗенека штити 60 проценти.
Зошто бројките варираат толку многу?
Стручњаците објаснуваат дека процентот на ефикасност е односот на луѓето кои се целосно заштитени со оние кои не се – ако вакцината има 80% ефикасност, 80 од 100 вакцинирани се целосно безбедни, 20 не се заштитени.
„Се потешко и потешко е да се измери колку вакцините навистина штитат затоа што стана невозможно да се контролира и следи кој е вакциниран, а кој не. Исто така, постојат разлики во контролните групи, некои луѓе се повеќе склони кон „поризични“ ситуации, додека други се повнимателни да не се изложуваат на ситуации каде што може да има вирус “, заклучуваат тие.
