Намалувањето на надворешните температури е поврзано со ризикот од срцев удар, покажуваат резултатите од најновото истражување на Школата за хигиена и здравје во Лондон.
Научниците откриле дека секое намалување на температурата за еден степен Целзиусов дневно е поврзано со околу 200 дополнителни срцеви удари.
Стручњаците за потребите на истражувањето проучиле 84 010 медицински податоци на пациенти примени во болница поради срцев удар меѓу 2003 и 2006 година. Споменатите податоци ги споредиле со дневните температури во Англија и Велс. Резултатите јасно покажале дека намалувањето на просечната дневна температура за еден степен Целзиусов е поврзано со кумулативно двопроцентно зголемување на ризикот од срцев удар во текот на еден месец.
Најголемиот ризик бил присутен во првите две седмици од изложеноста. Иако зголемениот ризик навидум може да изгледа мал, само во Велика Британија годишно се случуваат околу 146 000 срцеви удари, а овој мал ризик додава уште 200 дополнителни случаи на вкупната бројка.
На ефектот на намалување на температурата поподложни се постари лица на возраст меѓу 75 и 84 години, како и пациенти со претходни коронарни болести на срцето.
„Нашите резултати покажаа дека дури и во летните месеци ризикот од срцев удар се зголемува со намалување на температурите“, вели водачот на истражувањето д-р Крисхан Баскаран.
