
Истражувањата во Германија покажуваат дека посетата на музеи има корисен ефект врз депресијата, деменцијата и осаменоста, и дека често е поефикасна и поевтина од лековите.
Наместо медицина , уметност – пред повеќе од десет години, во Велика Британија започна експеримент кој го копираат многу луѓе низ целиот свет, од Канада, преку Белгија, па сè до Франција. Лекарите им даваат на пациентите рецепт за бесплатни посети на музеи како третман против стрес, депресија и други ментални болести.
Во Германија тоа е сè уште во почетна фаза и звучи футуристички, но во Британија е реалност веќе долго време. Тоа е дел од таканареченото „социјално препишување“, медицински рецепти за социјални и културни активности што придонесуваат за здравјето, и сето тоа е дел од здравствениот систем финансиран од државата, пишува агенцијата ДПА.
Издавањето на првите рецепти за музеј започна во 2014 година како дел од тригодишен наградуван пилот-проект, а првично беше наменет за постари, социјално изолирани лица. Денес, тие посети на галерии и музеи се цврсто вкоренети во здравствениот систем на Велика Британија и нивниот ефект е мерлив.
Според податоците од Националната алијанса за културно здравје и благосостојба, во 2023 година ваквите пациенти имале 37 проценти помалку посети на матични лекари и 27 проценти помалку упатувања на болничко лекување.
По Британија, следеше Канада, каде што лекарите во Монтреал издаваат рецепти за посета на музејот на ликовни уметности.
Секој лекар може да издаде до 50 рецепти годишно кои ги надоместува здравственото осигурување. А канадските студии покажаа дека луѓето кои го посетуваат музејот имаат значително подобар квалитет на живот и психолошко здравје.
Брисел се приклучи во 2021 година со пет музеи и 33 лекари. Денес, повеќе од десет музеи и 18 здравствени установи се вклучени во проектот, а трошоците ги покрива градот.
Во Франција, идејата се спроведува низ целата земја, а во исто време, многу научници го истражуваат влијанието што контактот со уметноста го има врз благосостојбата на луѓето.
Натали Бондил, поранешна директорка на Музејот на ликовни уметности во Париз, верува дека културата ќе биде за здравјето на луѓето во 21 век она што беше спортот во 20 век.
Истражувањата во Германија, исто така, покажуваат дека посетата на музеи има корисен ефект врз депресијата, деменцијата и осаменоста, и дека често е поефикасна и поевтина од лековите, пренесува ДПА.
Во 2019 година, Светската здравствена организација проучи повеќе од 3.000 студии, со јасен резултат дека уметноста и културата го зајакнуваат менталното и физичкото здравје, помагаат во надминување на болестите и го поттикнуваат процесот на лекување.
Сепак, научниците забележуваат дека, колку и да се во подем музејската и уметничката терапија и колку и да изгледа привлечна идејата, науката сè уште не е во можност дефинитивно да ги докаже нејзините медицински придобивки.