Ако сакате вашите бели дробови да бидат здрави тогаш откажувањето од цигарите е вистинската работа, но и она што се наоѓа на вашата чинија е еднакво важно затоа што одделни намирници можат да го подобрат здравјето на вашите бели дробови.
Во истражувањето објавено во Европскиот респираторен магазин, учествувале 680 испитаници од кои некои биле непушачи, некои поранешни и некои пушачи. Одговарале на прашања поврзани со нивната моментална исхрана и биле подложени на мерење на спирометар, тест кој ја мери функцијата на белите дробови врз основа на вдишувања и издишувања. Тестот бил повторен 10 години подоцна.
Истражувачите дошле до заклучок дека колку повеќе јаболка, банани и домати изеле поранешните пушачи, толку помало било оштетувањето на нивните бели дробови за време на тој период. Тоа е мошне важно затоа што стареењето и пушењето претставуваат најголема причина за намалување на функцијата на белите дробови. Оваа храна е добра затоа што содржи многу антиоксиданти кои помагаат во намалувањето на воспалението на дишните органи и потенцијално го подобруваат здравјето на белите дробови.
Уште една група антиоксиданти кои се нарекуваат флавоноиди можеби се, исто така, одговорни за ова. Овие состојки се наоѓаат во голем број овошја и зеленчуци и го прават дишењето полесно. Тоа објаснува зошто јаболката и бананите се поврзани со помало намалување на функцијата на белите дробови.
Овие намирници помагаат да се обнови оштетеното ткиво на белите дробови кое настанало со долгогодишното пушење. Претходни истражувања покажале дека луѓето кои јадат храна богата со каротеноиди (пигмент кој го има во портокаловите, црвени и жолтите плодови) имаат помали шанси да заболат од рак на белите дробови. Резултатите се одлични и кај оние кои ги оставиле цигарите, така оние кои ги оставиле цигарите и ја збогатиле храната со ликопен го намалиле ризикот од рак на бели дробови за дури 52 отсто.
