Малкумина се оние кои не сакаат пица, вкусно јадење кое обично е полно со масти, рафинирани јаглехидрати и соли. Но неодамна во Италија е послужена здрава варијанта на пица која на научна основа ја креирале членови на Институтот за истражување на тумори.
Научниците ангажирале стручњаци од разни области, вклучувајќи научни истражувачи, производители, дистрибутери и потрошувачи. Целта била само една: да се подобри јавното здравје и да се воведат навики за консумирање на здрава храна вклучувајќи ја и пицата.
Така е направена пицата Паскалина, која прв пат е послужена оваа година во позната пицерија во Наполи.
Станува збор за јадење кое по мислење на стручњаците може да помогне да се намали ризикот од кардиоваскуларни заболувања, како и од некои видови на тумор на органите за варење, како што е рак на дебелото црево.
Пицата која што го продолжува животот е направена од следните совршени состојки:
- Маслинки – богати со витамин Е и други моќни антиоксиданти. Содржат калциум, бакар и железо, добри се за здравјето на срцето, а, исто така, придонесуваат во превенцијата на ракот и остеопорозата.
- Маслиново масло – содржи здрави мононезаситени масни киселини и за разлика од останатите видови на масла, не дебелее. Маслиновото масло, исто така, е богато со антиоксиданти кои моќно делуваат на организмот. Содржи состојки кои делуваат антивоспалително, како што се олеинската киселина и олеокантолот.
- Домати – тие се извор на витамин Ц и други антиоксиданти, кои поволно делуват на здравјето. Извор се на ликопен – супстанца која е поврзана со намалување на ризикот од срцеви и мозочни удари, како и холин, калиум и растителни влакна, кои поволно делуваат на здравјето на органите за варење и на срцето.
- Чили пиперки – помагаат во превенцијата на заболувања на желудникот, а делуваат и антибактериски, благодарение, пред се, на капсаицинот кој ги уништува бактериите, како што е хеликобактер и помага да се санира воспаление или болест на цревата.
- Лук – поволно делува на имунитетот, има бактериолошки и антивирусни својства. Извор е на манган, витамин Б6 и витамин Ц.
- Брокула – зеленчук богат со растителни влакна, вода и сулфорафан – материја која превентивно делува против формирање тумор.
Интегралното пченично брашно и интегралните житарки содржат нутриенти кои помагаат при намалување на ризикот од зголемен крвен притисок и срцев удар.
