Ѓумбирот е многу популарен и корисен зачин, кој е богат со есенцијални витамини и минерали. Најпознат е по своето антивоспалително дејство, ефикасен е при ревматски болести, а воедно е и најдобар лек против мачнини.
Ова е рецепт за подготовка на пиво од ѓумбир, што може да го подготвите во домашни услови.
Со подготовка на ова пиво, ќе добиете супер здрав ферментиран напиток. Придобивки од ферментираните продукти има многу, а меѓу нив најважен е балансот на дигестивното здравје кој е важен за добар имунитет.
Состојки: 5 цм мелен свеж корен од ѓумбир, половина шолја кафеав шеќер, половина шолја сок од лимон, четвртина лажица морска сол, 8 шолји вода, половина шолја култура од ѓумбир (рецептот е најдолу).
Подготовка: Ставете во тенџере 3 шолји вода, ѓумбирот, шеќерот и солта. Оставете да се вари околу пет минути, за да се стопи шеќерот. Додадете го остатокот вода и почекајте да се излади на собна температура. Додадете го сокот од лимон и културата. Ставете го пивото во стаклен сад и добро затворете го. Оставете да отстои 2-3 дена, додека не стане газирано и пенливо, ако го сакате без алкохол, а доколку го оставите подолго време ќе стане алкохолен пијалок. Процедете го чувајте го во фрижидер.
Брзината на ферментацијата на пивото зависи од надворешната температура, видот на шеќерот и јачината на културата. Конечниот производ треба да има вкус на ѓумбир со специфична арома на квасец. Не го оставајте пивото долго да ферментира, бидејќи може да се случи и мини експлозија. Пивото чувајте го во фрижидер.
Како да направите култура од ѓумбир?
Тоа всушност е вид на габа слична на комбуха, која може да ја направите и дома
Состојки: 1-2 корени ѓумбир, половина шолја шеќер, 2 шолји филтрирана вода
Подготовка: Во поголем стаклен сад промешајте 3 лажици ситно сецкан свеж ѓумбир и 3 лажици шеќер. Помешајте со дрвена лажица и покријте со газа. Секој ден, во текот на 5 дена, додавајте по 1 лажица ситно сецкам ѓумбир и 1 лажица шеќер. Зависно од температурата зреењето може да трае и до 8 дена. Кога ќе почнат да се појавуваат меурчиња, да мириса на слаткарски квасец и се појавува матна течност, културата е готова. Ако мешавината ги нема овие карактеристики и по 8 дена, фрлете ја и обидете се повторно.
