Сите знаеме дека појадокот е најважен оброк и дека за здравјето на организмот е многу важно тој да не се прескокнува. Меѓутоа, секако, е важно што ќе појадуваме.
Најголема корист може да извлечеме од намирници кои се богати со антиоксиданти. Тие играат важна улога за здравјето и со внесувањето на антиоксиданти во организмот преку храната може да бидеме сигурни дека сме обезбедиле заштита од штетните влијанија на слободните радикали. Организмот со помош на витамини и минерали произведува антиоксиданти, но, исто така, ги внесуваме и со помош на храната што ја консумираме. Антиоксидантите се добри во превенција од рак, срцеви болести и ја подобруваат меморијата. Со оглед на бенефитите, нивниот внес во организмот е од голема важност, па затоа се препорачуваат неколку начини да се збогати исхраната и да се појадува поздраво.
Чаша природен овошен сок
Свежо цеден портокал или грејфрут е добро познат рецепт за збогатување на појадокот со доза здравје. Можете да пробате и сок од боровници или шипинки, кои, исто така, на организмот му даваат поткрепа со прекупотребните антиоксиданти.
Овошје во житарките
Супер здравите житарки кои се идеален оброк за почеток на секој ден, збогатете ги со природни шеќери кои се кријат во бананата, праските, сливите и сушеното овошје. Вкусен и здрав оброк полн со антиоксиданти ви е загарантиран на овој начин.
Јаткасти плодови
Особено се ефикасни кога е во прашање превенцијата на болести на срцето, но се богати со антиоксиданти, така што за појадок се препорачува исто како и бобинките да се комбинираат и користат со што повеќе намирници.
Зелен чај
Пијте го наутро за појадок, а ако сакате шолја зелен чај испијте повеќе пати во денот со што на организмот ќе му обезбедите висока доза на антиоксиданти.
Зеленчук во омлетот
Држете се до правилото дека шарената чинија воедно е и најздрава. На тој начин ќе знаете дека вашето тело е збогатено со состојки важни за здрав и долг живот. Ако сакате да појадувате омлет збогатете го со сечкана црвена, зелена или жолта пиперка, печурки, домати, спанаќ или брокула. Искомбинирајте повеќе бои и вашиот оброк ќе биде поздрав.
