Резултатите од две нови истражувања покажале дека лековите дизајнирани за стимулирање на имунолошкиот систем на пациентот можат да ја подобрат стапката на преживување кај пациентите со рак на белите дробови. Првата студија покажала дека пембролизумаб во комбинација со стандардната хемотерапија го намалува ризикот од смрт од рак на белите дробови во наредните 11 месеци за 50 отсто, во споредба со лекувањето единствено со хемотерапија.
Исто така, оваа комбинација го намалува ризикот од понатамошно ширење на ракот на белите дробови.
Втората студија покажала дека комбинацијата на лековите ниволумаб/ипилимумаб и стандардната хемотерапија го намалува за 42 отсто ризикот од прогресија на болеста по една година.
Резултатите од овие две студии се охрабрување за пациентите со рак на белите дробови да истраат во својата борба со ракот.
Во моментов, хемотерапијата е стандардна терапија за повеќето луѓе со рак на белите дробови. Во повеќето случаи, хемотерапијата го продолжува животот за само една година, па дури и помалку.
Но, овие резултати покажуваат дека пристапот на комбинација на лекови и хемотерапија резултирал со значително подобрување на одговорот на терапијата, преживување без прогресија и целокупно преживување кај сите пациенти кои учествувале во истражувањата, било истакнато на Годишната средба на Американска асоцијација за истражување на ракот.
