За само два месеци контрацептивните таблети за мажи би можеле да се тестираат на луѓе, најавуваат научниците по ветувачките резултати од испитувањата на глувци. Научниците од Универзитетот во Минесота, кои го создадоа лекот, најавуваат клинички испитувања веќе во јули оваа година. Нехормоналната таблета, под медицинското име YCT529, успеала да спречи 99 отсто од бременостите за време на испитувањата на глувци, со што резултатот е изедначен со женските лекови за спречување на бременост.
БЕЗ НУСПОЈАВИ
Притоа, лекот не предизвикал никакви видливи несакани ефекти, како зголемување на телесната тежина, а машките глувци биле способни да зачнат веќе четири до шест недели по прекинот на земање на лекот. Додека женската контрацепција делува така што ја спречува овулацијата, која се случува еднаш месечно, кај мажите целта е да се спречи дневното производство на милиони сперматозоиди. Повеќето лекови кои минуваат клинички испитувања имаат за цел да го спречат тестостеронот да произведува здрави сперматозоиди, но тоа може да има незгодни нуспојави како што се зголемување на телесната тежина, депресија или покачено ниво на холестерол.
“Сакавме да развиеме нехормонален машки контрацептивен лек за да избегнеме такви несакани ефекти. YCT529 го таргетира рецепторот на ретиноична киселина алфа – протеин кој игра важна улога во развојот на клетките, вклучително и производството на сперма“, објаснува водачот на студијата д-р Гунда Георг, истакнувајќи дека во текот на четири недели орално давање на лекот на глувци имало драматично намалување на бројот на сперматозоиди и 99% ефекасност во спречување на зачнување и тоа без видливи несакани ефекти.
