Кашлицата стручно се опишува како природен рефлекс на телото да ги заштити дишните патишта од надразнувачки материјали кои може да доведта до инфекција. Колку долго трае кашлицата, зависи од болеста што ја има човекот.
Во повеќето случаи кашлицата ќе исчезне кога болеста ќе се повлече, а може да потрае една недела или дури цел месец.
Понекогаш кашлицата може да трае и подолго од осум недели и тогаш станува збор за хронична кашлица, што може да биде знак за основна болест како што е астма или гастроезофагеална рефлуксна болест (ГЕРБ).
Секој кој има необјаснета кашлица, постојана кашлица која не престанува или кој кашла крв или црвена слуз треба веднаш да оди на лекар.
КАКО СЕ КЛАСИФИЦИРА КАШЛИЦАТА?
Кашлицата се класифицира во зависност од тоа колку трае. Не мора секогаш да биде знак на болест бидејќи на нејзината појава може да влијаат и различни иританси, надразнувачи кои, ако не се елиминираат од дишните патишта, може да доведат до инфекција.
Најчести иританси се:
- Чад
- Слуз
- Алергени како што се полен, мувла или прашина
КАШЛИЦАТА МОЖЕ ДА БИДЕ:
Акутна – што значи дека трае помалку од три недели. Инфекциите како обична настинка, синузитис или пневмонија имаат тенденција да предизвикаат акутна кашлица.
Субакутна – што значи дека трае помеѓу три и осум недели, задржувајќи се откако настинката или инфекцијата ќе исчезнат.
Хронична – што значи дека трае подолго од осум недели. Состојбите како што се гастроезофагеална рефлуксна болест (ГЕРБ), алергии, астма, хронична опструктивна белодробна болест (ХОББ), пулмонална фиброза и интерстицијална белодробна болест може да предизвикаат хронична кашлица.
КОЛКУ ОБИЧНО ТРАЕ КАШЛИЦАТА?
Колку долго трае кашлицата зависи од здравствената состојба што ја предизвикува.
НАСТИНКА
- Болката во грло трае околу осум дена
- Главоболката трае меѓу девет и 10 дена
- Затнатиот нос или течењето на носот може да трае подолго од две недели
- Кашлицата трае подолго од една недела
ГРИП
Грипот може да предизвика широк спектар на симптоми, кои исчезнуваат во различни периоди. Повеќето симптоми, вклучувајќи температура, треска, болки во мускулите и болка во грлото, обично ќе исчезнат за три до седум дена.
Други симптоми, вклучувајќи замор и кашлица, може да траат подолго од две недели, особено кај постарите лица или оние со хронични белодробни заболувања.
БРОНХИТИС
Акутна инфекција со бронхитис ќе се појави ненадејно и ќе трае помеѓу три и 10 дена. Меѓутоа, поврзаната кашлица може да продолжи неколку недели потоа.
КОРОНАВИРУС
Научниците сè уште ја проучуваат ковид инфекцијата имајќи предвид дека луѓето можат да искусат различни симптоми или воопшто да не ги доживеат.
Досега, студиите покажаа дека симптомите, кои вклучуваат сува кашлица, може да траат најмалку неколку дена до три недели. Кај некои луѓе, симптомите на ковид може да траат со месеци и тоа обично се нарекува продолжен ковид.
Симптомите на долготрајниот КОВИД-19 може да вклучуваат замор, отежнато дишење, „мозочна магла“, нарушување на спиењето, треска, гастроинтестинални симптоми, анксиозност и депресија. Сите тие можат да траат со месеци.
ГОЛЕМА КАШЛИЦА
Упорна кашлица која се влошува ноќе. По околу четири недели, кашлицата обично станува поретка и помалку интензивна. Сепак, може да поминат неколку месеци за целосно да исчезне кашлицата.
ВОСПАЛЕНИЕ НА ГРЛОТО
Инфекција на горните дишни патишта која обично ги погодува децата на возраст од шест месеци до три години. Предизвикува повторувачка кашлица. Се влошува ноќе и изгледа уште подраматично.
Останатите симптоми вклучуваат температура, течење на носот, болки во грлото и конгестија. Болката во грлото обично сама се повлекува во рок од три до четири дена. Доколку симптомите се влошат или продолжат, консултирајте се со педијатар.
АЛЕРГИИ
Кога некој има алергија, тој кашла кога е изложен на алергенот. Алергените се различни за секого, но вообичаени се чадот, поленот, прашината и влакната од домашни миленици.
Кашлицата поврзана со алергија обично исчезнува кога лицето ќе ги исчисти дишните патишта и повеќе не е во контакт со алергенот.
КОИ СЕ ПРИЧИНИТЕ ЗА ХРОНИЧНА КАШЛИЦА?
Понекогаш кашлицата трае подолго од два месеци и лекарите ја нарекуваат хронична кашлица. Според Американскиот колеџ за алергија, астма и имунологија, 90 проценти од постојаната или хронична кашлица се предизвикани од една од следниве состојби:
- Астма, хроничен бронхитис
- ГЕРБ, постназално капење
- Пушење
- ХОББ, рак на бели дробови
КОГА Е ПОТРЕБНА ЛЕКАРСКА ПОМОШ?
- Имате постојана кашлица која трае подолго од осум недели по почетната болест
- Имате упорна кашлица која постојано се враќа
- Имате постојана кашлица без други симптоми
- Имате постојана кашлица која предизвикува појава на крв или црвена слуз
