Коронавирусот ќе се врати и повторно опасно ќе се закани на јавното здравје кога ќе се укинат мерките на социјално дистанцирање, па најверојатно тие ќе бидат потребни до 2022. година, објавија научниците од Харвард. Нивната студија е објавена во време кога неколку европски и шест американски сојузни држави го разгледуваат делумното укинување на мерките и повторно покренување на економијата.
Математичката симулација која ја објавија во списанието Science, предвидува дека КОВИД-19 ќе стане сезонска болест, како сродните коронавируси кои предизвикуваат обична настинка и дека трансмисијата ќе биде почеста во зимските месеци.
“Предвидувањето дека пандемијата ќе заврши ова лето не е во склад со она што ние засега го знаеме“, изјавил еден од авторите, Марк Липстич.
Но, многу нешта засега се непознати, вклучувајќи го и тоа какво ниво на имунолошка заштита имаат оние кои ја преболеле болеста и колку долго таа заштита трае, напишале авторите.
ВИРУСОТ ДОЈДЕ ЗА ДА ОСТАНЕ
Со оглед на многуте непознаници, како би го процениле идното ширење на вирусот, научниците моделирале различни проценки на стекнатиот имунитет, колку инфекцијата ќе опаѓа во топлите месеци и новото на социјално дистаницрање.
Според овие симулации, вклучувајчи го еднократното социјално изолирање и повременото социјално дистанцирање, заразата повторно би “букнала“ откако ќе се укинат рестрикциите.
Посебно голем бран на болеста се вратил во зима, пример кој е веќе виден за време на пандемијата на шпанскиот грип во 1918 година, кога била заразена една четвртина од светката популација,а починале 100 милиони лица.
Моделот ги прикажал и последиците од предолгата изолација. Периодот од 20 неделна социјална изолација и економско затворање бил толку ефикасен во спречување на вирусот “ да во популацијата не е развиен речиси никаков имунитет“, а тоа за возврат во идниот бран на болеста, повторно предизвикало преоптоварување на одделите за интензивна нега, болниците и здравствениот систем.
Едно е сигурно, вирусот дојде за да остане. Малку е веројатно дека нивото на колективен имунитет ќе биде доволно распространето и силно да КОВИД-19 “изумре“, како што се случи со САРС во 2003.
Неколку јавноздравствени мерки може да се превземат за да се подобри прогнозата, наведуваат научниците.
Тоа вклучува: дијагностичко тестирање, ригорозно следење на контактите на заболените, ширење на капацитетите на одделите за интензивно лекување, прецизно тестирање на антитела, пронаоѓање на ефикасни методи на лекување и најголема надеж – вакцина.
“Не завземаме став за прифатливост на одредено сценарио со оглед на економскиот товар што го носи социјалното дистаницрање“, заклучиле научниците. “Но, нагласуваме потенцијално катастрофален товар за здравствениот систем ако мерките за дистанцирање на бидат ефикасни или ако не бидат на сила доволно долго“.
