Досега во Македонија од КОВИД-19 се излекувани 139 лица. Според насоките кои се применуваат во земјава, пациент се смета дека е оздравен кога нема симптоми на болеста, а се отпушта од болница или се евидентира како излекуван во домашни услови, кога брисот од носот и грлото се покаже негативен во две последователни испитувања во период од 48 часа. Отпуштените пациенти мораат да бидат 14 дена во самоизолација. За споредба, во Германија и во Австрија пациентите се отпуштаат од болничко лекување веќе по првиот негативен тест.
Во претходните недели на кризата предизвикана од КОВИД-19, малку се знаеше за широкиот распон на можни симптоми и типичниот развој на болеста. Сега се знае дека најчеста форма на зараза е по капков пат, и дека вирусот SARS-CoV-2 главно влегува низ уста, нос или очи.
Инкубацијата, односно периодот од појава на првите симптоми трае од два до 14 дена, во просек 5-6 дена. Но, познати се и ретки исклучоци кај кои инкубацијата траела и до три недели.
Се уште не е познато колку рано почнува заразниот период во текот на инкубацијата, но се смета дека инфицираното лице почнува да го “отпушта вирусот“ во околината два до три дена пред појавата на првите симптоми.
Според една мала студија објавена во списанието Nature, пациентите со блага форма на КОВИД-19 се најзаразни околу петтиот ден од избивање на симптомите. Оние со тешка форма се најопасни за околината околу 10. ден од појавата на симптомите.
Кај пациентите кои имаат симптоми, најчести се висока температура, сува кашлица, замор, краток здив, и поретко пролив и повраќање. Се почесто, пациентите со блага форма на болеста, како симптом го истакнуваат губењето на сетилото за вкус и мирис.
Околу 80 проценти од дијагностицираните случаи на КОВИД-19 имаат само благи до умерени симптоми.
Кај поблагите случаи, по кусиот инкубациски период, опоравувањето трае околу две недели. Кај потешките случаи, лекувањето трае повеќе недели, а кај критичните се завршува со смртен исход.
“Болеста може да се развива во фази. Пациентот доаѓа со благи или со умерени симптоми, а тогаш петтиот до деветиот ден, тоа навистина може да експлодира. Таа експлозија се случува кај лица кои се предодредени за развој на тешка форма на болеста“, појаснува д-р Роберт Салата, професор по епидемиологија и меѓународно здравство на Универзитетот во Кливленд.
Иако научниците се уште сигурно не знаат кои пациенти ќе развијат тешка форма на КОВИД-19, извесно е дека пациентите со дијабетес, хронични срцеви и респираторни тегоби се изложени на поголем ризик. Најново истражување укаажува на тоа дека еден од клучевите во развојот на тешка форма на болеста, може да биде вирусното оптоварување, односно количината на коронавирус која влегла во организмот на некое лице.
“Кај поголемиот дел од пациентите, тестот од брис кај пациентот е позитивен, седум дена по појавата на првите симптоми. Десет дена по избивање на симптоми, тестот често е негативен. Но, забележани се случаи на пациенти чии тест бил позитивен дури 37 дена по појавата на првите симптоми“, истакнува проф. Салата.
Кај околу 50% од пациентите со блага форма на КОВИД-19, тестовите покажувале присуство на коронавирусот, дури осум дена откако сите симптоми на болеста исчезнале, покажало истражување објавено во American Journal of Respiratory and Critical Care Medicine.
“Видовме и случаи на пацинети кои биле негативни на тестирањето, но и натаму имале симптоми, како кашлица. Претпоставката е дека таквите лица сепак не се веќе заразни, но тоа не можеме да го кажеме со сигурност“, заклучува проф. Салата.
